Maibé buat hirak ne’e muda bainhira Timor-Leste hetan ninia independensia. FALINTIL ne’ebé transforma an sai forsa modernu iha Forsa Defeza Timor-Leste ninia ‘isin’hahú dame pasadu. FALINTIL Forsa Defeza Timor-Leste no Tentara Nasional Indonesia (TNI) hili liu atu hateke ba oin maske la haluha sofrimentu iha pasadu.

Iha ona prova lubuk ida dezde inisiu independensia, oinsa F-FDTL ho TNI bele ona hasees konflitu iha tempu pasadu hodi hateke ba oin.

Foun liu, F-FDTL konvida Komandante TNI, Jeneral Muhamad Andika Perkasa, hodi partisipa iha aniversariu FALINTIL ba tinan 47.

Iha aniversariu FALINTIL ne’e, Prezidente Repúblika José Ramos Horta oferese medulla grau meritu ba Komandante TNI ne’e.

“Ha’u hakarak hato’o ha’u-nia obrigadu barak ba estadu Timor-Leste ne’ebé ho fuan boot hakarak kondekora ha’u no ha’u apresia tebes, ba ha’u ida ne’e hanesan orgullu ida, dala ida tan ha’u hakarak  hato’o ha’u-nia obrigadu,” dehan Jenerál Andika ba jornalista sira bainhira vizita Kuartel Jeneral F-FDTL,  Fatuhada, Sesta (19/08).

Aleinde ne’e, prezensa husi Komandante TNI ne’e mós afirma hikas komitementu husi forsa defeza nasaun rua ne’e atu apoiu malu hodi hateke ba oin.

Iha ninia deklarasaun, Jeneral Andika hatete, TNI prontu apoiu F-FDTL iha dezenvolvimentu komponente Terrestre, Naval no Aero.

“Ida ne’e hanesan ha’u-nia vizita daruak nian bainhira ha’u akompaña Prezidente Joko Widodo iha 2015. Maibé ha’u-nia vizita ida ohin, ha’u ho Jenerál Falur koalia asuntu kooperasaun teknika militár nian no ami hakarak aloka osamentu atu apoia dezenvolvimentu F-FDTL nian iha area komponente Terrestre, Navál no Aero,” dehan Andika ba Jornalista iha Kuartel Jeneral F-FDTL, Fatuhada, Dili, Sesta (19/08).

Iha tinan oin, nia dehan, TNI sei hahú implementa kooperasaun no komandu F-FDTL sei haruka nia membru ba estuda iha area tolu ne’e iha Indonezia.

Alende ne’e, Jeneral Andika hatutan, nia ho Falur koalia mós kona-ba oinsa kria komunikasaun direita ho F-FDTL iha futuru, liu-liu tau atensaun liu tan ba iha liña fronteira Timor-Leste nian.

“Ha’u ho Tenente Jenerál Falur ko’alia sei halo kontaktu direita ho nia, iha buat balun kona-ba atividade ilusitu mosu iha área fronteira, TNI sei apoiu hodi prevene atus ilusitu iha fronteira,” dehan nia.

Iha fatin hanesan, Xefe Estadu Maiór Jenerál F-FDTL, Tenente Jenerál Falur Rate Laek hatete, nia parte kontente no apresia ba vizita ne’e Jenerál TNI nian.

Nia dehan, Jeneral TNI ne’e komprometidu atu apoiu F-FDTL, liu-liu ba fomasaun militár iha area tekniku militár  ba membru F-FDTL sira.

“Ita tenke kria koopersaun ho ema hotu, ita-nia ema antes ne’e ita haruka 200 ba estuda kona-ba militár nian iha Indonézia, maibé tinan oin sira hakarak haruka tan ema barak ba eskola superior nian iha akademia militar indonezia, Lembaga Ketahanan Nasional (LEMHANAS) no Sekolah Khusus Komando, sira mak selu,” dehan nia.