Prezidente Jurisdisaun AMP, Arão Noe de Jesus hatete, provizoriamente hetan ona vitória, tanba ne’e hahú ona halo preparasaun ba estrutura Governu sombra, lei orgánika governu, programa no Orsamentu Jerál Estadu (OJE).

“Ami nia estrutura sombra ba VIII Governu preparadu hotu ona, maibé ofisialmente ami seidauk bele anunsia ba públiku”, dehan nia, iha Parlamentu Nasionál, horisehik.

Agora daudaun AMP hein hela desizaun Tribunál Rekursu hodi legaliza vitória ne’ebé hetan ona, nune’e foin bele publika sai lista membru governu sira ne’e.

Prezidente jurídiku ne’e deskorda no la rekoñese estrutura sombra VIII Governu ne’ebé ema lansa iha média sosiál (medsos) ho versaun tolu.

“Ami la hatene (kona-ba lista ne’e), tanba ne’e públiku labele fiar ba boatu ne’e”, tenik nia.

Alende ne’e, AMP mós seidauk konfirmandu loloos figura na'in rua hanesan Kay Rala Xanana Gusmão no Taur Matan Ruak ne’ebé atu sai Primeiru Ministru, tanba oras ne’e daudaun sei iha faze diskusaun altu nivel AMP nian.