Ko’alia kona-ba formatu koligasaun ne’e, Prezidente Comissão Nacional Eleições (CNE), Alcino Barris de Araújo hateten, perante eleisaun iha koligasaun tipu rua maka antes no depois eleisaun.

“Hanesan AMP ho FDD iha ona rezultadu sira bele halo koligasaun ho partidu sé de’it hodi forma koligasaun, tanba Konstituisaun artigu 106 fó dalan”, dehan nia, iha knaar fatin, horisehik.

Partidu tolu ka haat ne’ebé halo pra-koligasaun ka antes koligasaun hodi hasoru eleisaun ne’e sira avansa ho lista úniku hanesan partidu ida. Tanba ne’e, kuandu rezultadu eleisaun mai mak la manan maioria absoluta, sira hakarak halo fali koligasaun ho partidu seluk ne’e lei fó dalan.

Alcino hatete, Konstituisaun artigu 106 hateten partidu ida atu forma governu tenke maioria parlamentár. Tanba ne’e, kuandu rezultadu eleisaun mak partidu ida la manan maioria hakarak ka lakohi tenke halo koligasaun.

Entretantu, Prezidente Jurídiku AMP, Arão Noe de Jesus hateten, partidu koligasaun AMP sei hili figura na’in rua kaer kargu primeiru ministru maka Xanana Gusmão no Taur Matan Ruak, bainhira forma duni VIII Governu.

Tanba ne'e, loke odamatan nafatin ba partidu ho koligasaun sé de'it halo koliga. Nune'e, AMP iha ona kompromisu ida hodi deside lider na'in rua ne’e maka atu kandidata ba kargu xefe governu.