Prezidente Parlamentu Nasional Arão Noe Amaral hatete, iha tinan ida bloku AMP kaer ukun maibé membru governu sira ho deputadu AMP laiha relasaun di’ak tanba sei kontinua mantein irarkia partidu idaidak ninian.

Arão dehan, iha PN deputadu AMP ne’ebé apoiu governu solidu tebes, ida ne’e bele hatudu liu husi bankada AMP sira iha PN ne’ebé seidauk kontra programa VIII Governu Konstitusional.

“Maibé ha’u bele dehan to’o agora priamblu ne’e mak seiduk funsiona ho di’ak, durante ne’e PN la’o ketak, govermu la’o ketak, ida ne’e mak akontese iha AMP nia laran,” deklara Arão liu husi ninia diskursu iha serimonia abertura Konfrensia Nasioal Aliansa Mudansa ba Progresu (AMP) ho tema “Konsolida AMP hodi Serbi Di’ak Liu Tan Povu” ne’ebé realiza iha Otel Golgota, Rai-kotu, Dili, Sabadu (15/06).

Tan ne’e, nia husu ba membru governu sira atu labele uza irarkia partidu idaidak nian hodi haluha tiha liña koordenasaun entre governu ho PN.

Nia esplika, nu’udar ema politiku, ligasaun ba malu iha kualker momentu tenke iha nafatin, maibé bainhira membru governu mak kontinua ho modelu irarkia sei hasoru problema boot iha futuru.

“Ami (deputadu AMP) nu’udar defensor ka guardiaun oinsa mak bele sa tan bola labele golu, entaun ami presiza informasaun husi imi membru governu sira, maibé imi la intende ida ne’e di’ak liu ami husik bola ne’e golu par ita monu rame rame,” dehan Arão.

Prezidente PN ne’e dehan, hanoin ida ne’e mak nia hakarak soe iha Konferensia AMP nian atu bele hetan konkluzaun ida loloos nune’e ba oin tenke loke ligasaun ba malu hodi bele la’o iha dalan ida de’it.