Tuir fali husi partidu FRETILIN ho votu 213.324 ne'ebé hetan kadeira 23, Partidu Demokrátiku (PD) kadeira lima (5) ho totál votu 50.370, ikus liu maka koligasaun Frente Dezenvolvimentu Demokrátiku (FDD) hetan kadeira 3 ho totál votu 34.301.
Haree ba rezultadu ne’ebé hetan, família boot partidu koligasaun AMP realiza misa agradesimentu hodi husi kbiit no forsa ba Aman Maromak, atu haraik forsa ba ukun VIII Governu Konstitusionál 2018-2023.
Misa ne’e hodi hato’o mós agradese ba konfiansa husi povu tomak hodi fó ona votu ba AMP hodi ukun nasaun ho pás no armonia.
Misa agradesimentu ne’e prezide direita husi Bispu Dioseze Dili, Don Virgílio do Carmo akompaña husi, Vigáriu Jerál Katedrál, José António, no Padre Evaristo da Costa.
Liu husi nia omilia, Bispu dehan, santa misa ne’e nu’udar sinál agradese husi AMP ba konfiansa povu nian no liafuan obrigadu manifesta favór ne’ebé simu husi ema seluk tanba, marka virtude ida fundamentál iha ema hotu nia moris.
“Ema ne’ebé fó obrigadu tanba rekoñese nia limitasaun, rekoñese ida seluk nia tulun no apoiu. Dala barak ita haree buat di'ak oioin ne’ebé ita hetan husi Na’i Maromak, dala barak mós ita la presiza, ezemplu moris, saúde, família, amizade, armonia, pás no seluk tan”, katak Amu Virgílio.
Entretantu, Don Virgílio husu atu AMP ne’ebé manan atu kumpre promesa hadi’a nasaun no povu nian moris no ba partidu FRETILIN, PD no FDD ne’ebé sai opozisaun atu apoia programa governu ba interese povu no nasaun.
Nia espera prezensa VIII Governu bele hakotu lalais impase polítika iha Timor-Leste hodi fó hakmatek ba povu no fó biban pozitivu ba dezenvolvimentu ekonomia nasaun.
“Durante tinan ida, rona governu paradu, ita nia esperansa mak governu ida forte, estavel no garante transparénsia, pás armonia no dezenvolvimentu ba povu no nasaun ne’e”, dehan Bispu, iha Igreja Katedrál-Dili, horisehik.
Bispu husu ba VIII Governu tenke kaer metin prinsípiu hodi la’o ba oin promove nafatin dame no estabilidade no Igreja prontu koopera ho lider partidu hotu- hotu hadi'a povu nia moris.
“Sé de'it maka povu fó fiar, Igreja dezde uluk kedas too agora sempre kolabora ho di'ak,” nia hateten.
Bainhira jornalista husu kona-ba figura Primeiru Ministru VIII Governu, Bispu Virgílio lakohi fó komentáriu, tanba kestaun ne’e partidu AMP maka sei deside.
Nia hatutan, agora daudauk nasaun no povu presiza liu mak figura se mak lidera governu presiza hakuak povu no rona povu no ema hotu nia preokupasaun.
“Ha’u hanoin importante liu maka Timor presiza figura ida ne’ebé hakuak ema hotu ho mehi ida lori povu ba moris di'ak mak ita presiza liu,” tenik nia.
Misa ne’e partisipa direita husi, Prezidente AMP, Kay Rala Xanana Gusmão, Portavós AMP, Taur Matan Ruak no kuadru polítiku no militante AMP tomak.
Entretantu, tuir informasaun husi membru AMP balun haktuir katak, alende misa, lider AMP na’in tolu sei halo rituál agradese ba foho lulik, Matebian, Ramelau no foho Kablaki no matebian hotu ne’ebé fó forsa ba susesu ne’ebé AMP hetan ona atu kaer ukun ho di’ak liután.
