Enkuantu, asaun protesta ne’e halo durante fulan rua nia laran.

Tuir Koordenador Aliansa Maubere Nasional (AMN) Miguel Monsik hateten, AMN hamrik no la konkorda ho politika Parlamentu Nasional nian ne'ebé kada periodu sai hanesan tradisaun ida, hodi sosa no halo lelaun ba kareta luxu.

Nia dehan, infelismente sira mak desidi no sira mak hala'o no sira mak sai benefisiariu ba saida deit mak sira desidi,

"Entaun ita hare katak ne'e tendensius konflitu interese bo'ot tebes iha sira nia an,tanba ne'e ohin ita hamrik hamutuk iha Aliansa Maubere Nasional sei ejizi durante fulan rua nia laran ita tenta atu fanun ema hotu, atu bele fó presaun politika ba Parlamentu Nasional hodi dada fila sira nia osamentu privativa iha debate osamentu tinan fiskal 2023 ninian," dehan nia ba Jornalista sira hafoin halo asaun protesta iha Kampus UNTL liceu, segunda ne’e (07/11).

Ho nune'e, nia dehan, grupo movimentu sira hamutuk  ho estudante sira husi universidade oioin, sei nafatin rejiste iha Kampus UNTL nia oin hodi ejize nafatin durante fulan rua no akumula ema barak liu tan hodi fó lisuk protesta ba Parlamentu Nasional.

"Ita nia ezijensia dahuluk husu ba Parlamentu Nasional hodi dada fila sira nia osamentu privativu ne'ebé hodi sosa kareta no laptop, ita nia ezijensia daruak mak halo kampaña ba ema hotu katak, lei pensaun mensal vitalisia ne'e so hatodan deit OJE atu ba deputadu sira nia aan, tanba kada tinan alokasaun osamentu jeral estadu bo'ot liu ba sira nia salariu no setor naun produtivu sira, entaun ita hanoin katak, halakon lei ne'e hodi fó espasu ba alokasaun osamentu bo'ot liu ba setor seluk," tenik nia.

Tan ne’e, hahú ona konvida partisipasaun povu nian hodi obriga Parlamentu Nasional labele sosa kareta no laptop.

“Nune’e, PN atu dada fila sira nia osamentu privativu ne'ebé hodi sosa kareta no laptop ne’e ka la'e?, defende presaun politika ne'ebe povu fó ba sira, tanba ohin abertura ita fiar katak durante fulan rua nia laran sei fanun ema barak atu kondena hodi protesta makas, liu-liu setor sira ne'ebé sai vitima ba sasan sira ne'e," nia akresenta.

Nia haktuir, asaun protesta ne’e, sei ivolve mós traballadór sira ho salariu $115, agrikultura kamponeza sira no vendedor ambulante sira.

Entretantu, Kooordenadór ne'e garente katak, durante asaun protesta hasoru PN, sei kria estabilidade no laiha konflitu ruma durante fulan rua nia laran.

Enkuantu, tuir observasaun husi Online INDEPENDENTE iha terenu nota katak, iha asaun protesta husi estudante universidade sira liu husi Aliansa Maubere Nasional (AMN) hasoru Parlamentu Nasional hetan seguransa maximu hosi Polisia Nasional Timor-Leste (PNTL).