Nia hatete, preokupasaun ba timoroan sira no sidadaun sira ne'ebé kontinua ba Portugál ne'e boot tebes, entaun mai atu hamutuk ho Prezidente Repúblika atu fó opiniaun fó solusaun ne'e mak husu molok nia atu ba Portugál.
"Ohin ami ko'alia, ha'u fó ha'u nia proposta, ba Prezidente, atu lori proposta ne'e ba Portugál para ajuda fó solusaun, solusaun ida ke temporariu mas tenke iha solusaun para depois atu hahú prosesu ida ke para atu bele solusaun ida permanente mas tenke iha solusaun ida, tanba sira ba toba iha jardín ne'e agora rai komesa malirin ona ne'e susar tebes. Ne'e mak ha'u-nia preokupasaun boot agora," dehan Alkatiri, iha Palásiu Prezidensiál Bairru-Pité, Sesta (28/10).
Nia hatutan, proposta ne'e prezidente atu lori ba Portugál atu kria kondisaun para sira bele aprende buat ruma iha Portugál, hahú ho língua portugeza, see sira serbisu nia balu ke sira hakarak halo iha ne'ebá, sira tenke iha oportunidade ida atu hetan treinu.
Entretantu, Alkatiri afirma, timoroan sira kontinua ba tan ne'e presiza halo akordu hanesan mós kooperasaun entre Timor no Koreia.
"Agora sira ida atu ba tan, ne'e ita halo dadauk ba Korea fó uluk treinu iha ne'e treinu língua profisional, depois hotu-hotu iha direitu ba ne'ebé de'it, labele ba ema nia rai atu sai fali refujiadus, ba para atu kontribui lori sira nia kbiit, sira nia kapasidade para atu hatudu katak, ita mós iha talentu, sé mak hakarak hala'o múzika bele halo," dehan nia.
Nia hatutan, kooperasaun entre Timor -Portugál la'o kleur, tuir nia hanoin la’ós lobi polítika ho Portugál, maibé sira ba Portugál governu mós hatene, maibé nu'udar líier nasionál ida preokupa makaas tebes ho joven sira ne'e buka ko'alia ho autoridade Portugál sira liuliu Prezidente Repúblika Portugál.
Tuir Alkatiri, Estadu iha obrigasaun trava ajénsia ilegal sira, tanba ne'e tráfiku ilegal no tráfiku tanba ema barak sai ona no balu fó osan dobru.
"Ha'u dehan katak, obrigasaun Estadu Timor trava, ida ne'e trafiku ilegal trafiku umanu, ema sira sai vitima, balun husu osan dua kali lipat. See ó husu rihun US$ 3 o selu fali rihun US$ 6 ne'e atu oho ema seluk. Ne'e tenke hapara, polísia tenke atua maibé ne'e ha'u la ukun, ha'u ko'alia ne'e hanesan konsiensia nasionál, sé ha'u mak ukun ne'e ha'u hahú kleur ona," dehan nia.
Nune'e, enkontru Prezidente Repúblika José Ramos Horta konkorda ho proposta ne'e ba Portugál atu fó solusaun ba timoroan sira problema ne'ebé sira enfrenta.
Molok ne'e, Primeiru Ministru Taur Matan Ruak informa, governu Timor-Leste sei buka meius oin oin hodi rezolve problema ne'ebé Timor oan sira hasoru iha Portugál.
