Diretór Interino AHDMTL, Gabriel de Sousa, hatete, Governu liu husi MSSI tenke tau osamentu ne’ebé sensivel, atu haree ba instituisaun defisiensia, orfonatu no uma mahon sira. Ida ne’e mak objetivu prinsipal ne’ebé AHDMTL hato’o ba Komisaun F.

Nia dehan, orsamentu ne'ebé preve iha tinan ne'e, mai ho montante ne'ebé kiik iha Diresaun ISS, tanba orsamentu ne'e laiha sensivilidade ba ema ho defisiensia sira atu halo nia atividade sira.

"Iha tinan ne'e Diresaun Institutu Nasional Seguransa Sosial, ne'ebé iha MSSI ho $1.000 deit, ne'ebé mak devide ba organizasaun noun-governamentl rua nulu-resin, sira nia orsamentu ne'e la sufisiente, tanba ne'e mai hasoru Komisaun F atu haree, hodi buka solusaun,”dehan nia, iha Parlamentu Nasional, kuarta ne’e (22/06).

Nia dehan, proposta ne'ebé AHDMTL hatama ba iha MSSI, husu kuaze dolar amerikanu rihun $90, maibé parte relevante ko’a fali no hetan deit mak dolar amerikanu $40, entaun orsamentu ida ne'e la responde ba atividade sira.

Nia akresenta, atividade importante ne’ebé AHDMTL halo mak hanesan, formasaun ba defisiénsia sira, rekoilla dadus defisiénsia nian, advokasia ba komunidade no komunidade nivel altu sira.

Enkuantu, nia dehan, treinadór sira ne’ebé fó formasaun ba defisiénsia sira ne’e voluntariu deit.

Tanba ne’e, husu ba Komisaun F, atu foti desizaun positivu ruma.

Nia haktuir, Komisaun F sei haree asuntu ne’e no sei halo audensia ho MSSI atu haree ba orsamentu ema ho defisiénsia nian.

Iha fatin hanesan, Prezidente Komisaun F, Noe da Silva, hatete, tuir polítika governu ida ne'e nian, labele husik  ema ida iha kotuk no iha direitu ba moris hanesan.

Ho nune’e, lamentasaun sira ne’ebé AHDMTL hato’o, pertinente tebes, nune’e Komisaun F sei buka solusaun alternativa ruma ba fundu hodi rezolve ba organizasaun ne’ebé sira hala'o ona.