ADTL Observa Planu Asaun Nasionál no Inkluzaun EhD sei Menus Featured

By Ivonia Varela Fevereiru 27, 2024 3393
Diretór Ezekutivu ADTL, Cesário da Silva. Foto:INDEPENDENTE. Diretór Ezekutivu ADTL, Cesário da Silva. Foto:INDEPENDENTE.

DILI: Asosiasaun Defisiensia Timor-Leste (ADTL), realiza ho dialogu nasional ho Ministeriu relevante ne’ebé foti desizaun ba Planu Asaun Nasional (PAN) ba Inkluzaun Defisiénsia ho tema “Unifika asaun hodi salva alkansa inkluzaun defisiensia iha Timor-Leste”.

Tanba durante ne’e,  ADTL observa,  makfoti desizaun sira seidauk iha vontade másimu envolve ema ho difisénsia sira ba programa Planu Asaun Anuál.
Diretór Ezekutivu ADTL, Cesário da Silva hatete, iha diálogu, bolu atensaun ba makfoti desizaun, sira atu halo diskusaun ho organizasaun defisiénsia kona-ba asaun saída mak atu halo hamutuk ba iha asuntu inkluzaun defisiénsia.
“Ami akompanha no observa durante ne’e barak liu ita iha polítika di’ak ba asuntu inkluzaun defisiénsia ita-nia asaun atu konkretiza polítika planu programa sira ne’e mak menus. Tan ne’e ADTL inisiativa halo diálogu ida hodi konvida ministériu relevante sira mai koalia kona-ba saida mak ita atu halo hamutuk ba inkluzaun difesiensia,” dehan Diretór ADTL ba salaun retiru Dare, Tersa (27/02).
Nia dehan, TL ratifika konvensaun ONU ba ema defisiénsia iha Planu Asaun Nasional, tan ne’e saída mak governu atu halo hodi asegura alokasaun rekursu estadu nia ba implementasaun politika hirak ne’e.
“Tan ne’e ami-nia esperansa atu alkansa lema la husik ema ida iha kotuk mak presiza asaun konkreta, ita hakarak ne’e asaun husi entidade hotu-hotu nian liliu governu nian asaun atu bele haree no la husik ema defisiensia iha kotuk, ne’e presiza asaun,” dehan nia.
Diretór afirma, asaun sira ne’ebé parte relevante sira presiza halo mak hanesan mellora kondisaun sira atu ema hotu-hotu bele asesu garante edukasaun ida ne’ebé mak ema hotu bele asesu, kualidade edukasaun no garante asesu ba informasaun ne’ebé mak asesível no sensível di’ak ba sidadaun.
Iha fatin hanesan, reprezentante Primeiru Ministru, Ministru Komersiu no Industria (MKI), Filipus Nino Pereira hateten, nia parte sei konsolida liña Ministériu sira, atu fó atensaun no tau prioridade ba asuntu ba ema ho defisiénsia, atu nune’e ema hotu bele hetan oportunidade.
Tanba ne’e, asaun konkreta ne’e la'os polítika atu hakerek de’it iha surat tahan, maibé tenki implementa ho asaun.
“iha diálogu nasionál ida ne’e ita atu konsolida liña ministeriais sira hotu para oinsa fó mós atensaun fó mos prioridade ba timoroan sira liliu Ema ho Difisiénsia (EhD) sira, ne’ebé mak hatete katak labele husi ema ida iha kotuk tanba ne’e ita dehan oportunidade tenki iha ba EhD sira, ida ne’e mak sira presiza asaun konkretas,” Ministru hato’o.
Enkuantu, oradór ba dialogu ne’e mak Ministeriu Silodaridade Sosial no Inkluzaun (MSSI), Provedória Direitus Humanus no Justisa (PDHJ), Ministeriu Edukasaun (ME), Ministeriu Obras Públiku (MOP) no Asesór Prinsipál Prezidente Repúblika ba Asuntu Sosiais.

Rate this item
(0 votes)
Last modified on Tersa, 27 Fevereiru 2024 18:08

Independente Digital TV