Portavóz ADTL, Rosalia Teresa Perreira, konsidera aprovasaun dokumentu importante ne’e ADTL ne’ebé tau-matan ba asuntu defisiénsia iha TL, hakarak hato’o apressiasaun ba Primeiru-Ministru, Ministra Solidariedade Sosiál no Inkluzaun (MSSI), no Ministériu relevante-sira ne’ebé integra PAN defisiénsia ba sira nia politika no programa.

“Dokumentu Ida ne’e ami konsidera importante tanba hanesan mata-dalan ba planeamentu dezenvolvimentu TL ida inkluzivu no sensível  ba asuntu defisiénsia, hodi atinje no la husik ema Ida ba kotuk,” Rosalia Teresa Perreira  hateten liu husi Konferénsia Imprensa iha edifísiu ADTL, Mascarenhas, Kuarta (13/10).

ADTL husu nafatin ba Ministériu no Sekretáriu Estadu-sira ne’ebé mak hola parte atu implementa PAN nian tenke tau ba orsamentu kada tinan, hodi assegura implementasaun.

Governu mós tenke sosializa PAN ne’e ba diresaun hotu iha Ministériu, hodi assegura entendimentu ba dokumentu husi parte hotu.

PN tenke mantein halo fiskalizasaun no monitorizasaun ba implementasaun PAN husi ministériu-sira no governu TL, asaun kontinua tuir importansia no relevante husi PAN defisiénsia.

Ratifikasaun konvensaun ONU ba direitu ema ho defisiénsia no estabelesimentu Konsellu Nasionál, ba promosaun no protesaun direitu ema ho defisiénsia iha TL.

Iha fatin hanesan, Diretór ADTL, Cezário da Silva, hateten ADTL hakarak halo sosializasaun ba diresaun relavante-sira, tanba tuir akompañamentu husi ADTL katak PAN defisiénsia nian iha tinan 2014-2018, ministériu relevante-sira la apar ho dokumentu sira.