Adidu Traballu iha Austrália Seidauk Hatán MM Ba Servisu Featured

By Ligia Noronha Maiu 16, 2018 874
Polisia kaptura traballador MM iha Aeroportu Polisia kaptura traballador MM iha Aeroportu

DILI: Relasiona ho insidente ne’ebé hamosu husi traballadór timoroan inisiál MM iha aviaun laran, Sekretáriu Estadu Juventude no Traballu (SEJT), liu husi nia Adidu Traballu iha Austrália, la autoriza atu empregadu ne’e atu ba servisu iha ne’ebá.

Diretór Polítika Empregu SEJT, Lúcio dos Santos hatete, iha opsaun rua ba traballadór ne’e, ida maka iha parte saude sei hein nia rezultadu teste mak foin bele deside.

Opsaun seluk maka, konfirma ho Adida Australia nian fó informasaun mai katak ho kondisaun traballadór ne’e karik la autoriza ona atu ba.

“Informasaun provizóriu mak ne’e, kansela. Maibé, nia sei ba halo tratamentu, iha ona rezultadu mak foin bele deside klaru”, dehan nia, iha knaar fatin, SEJT, Kaikoli-Dili, horisehik.

Adidu la autoriza tanba ho kondisaun traballadór ne’e maka obriga ba, bele mós prejudika traballadór sira seluk ne’ebé servisu iha rai ne’e.

Diretór ne’e dehan, klaru liu ka iha finál ne’e Sekretáriu Estadu, Nívio Magalhães, maka bele hataan kona-ba asuntu ne’e.

Maibé, sira husu ba traballadór ne’e labele foti desizaun ba nia aan rasik, tanba nia mak hasoru problema, maibé presiza parte ospitál nian maka foti desizaun bazeia ba nia saúde.

Antes ne’e, SEJT Nívio Magalhães klarifika ba públiku kona-ba akontesimentu iha loron 3 fulan Maiu, traballadór na’in 25 ne’ebé arranka maibé iha aviaun laran traballadór ho inisiál MM halo asaun ne’ebé la klaru.

Antes MM ho nia maluk sira atu arranka ba Austrália, sira sei liu husi teste médiku ne’ebé hala’o iha klínika Cindranita no nia rezultadu di'ak.

Signifika, MM nia saúde di'ak, tanba ne’e mak MM prienxe kritériu atu ba servisu iha rai liur.

Iha loron ne’e duni, bolu kedan MM mai iha SEJT no mós parte diresaun nasionál empregu nian hodi rona akontesimentu ne’e husi MM rasik.

Alende ne’e, husu mós ba nia kaben keta hetan moras ruma karik, maibé buat ne’ebé sira hato'o mai iha SEJT katak, tuir kultura nian buat balun presiza haloos.

Ne’e duni, MM ba check up iha Hospital Nasionál Guido Valadares (HNGV) atu bele hatene loloos kauza ne’ebé akontese ona ba nia.

Ne’e duni, atu hateten katak, posibilidade traballadór ne’e atu fila fali ba servisu iha Austrália, presiza hein rezultadu teste.

Rate this item
(0 votes)

Independente Digital TV