Ezijensia husi MAPK ne’e mosu relasiona ho desizaun governu TL hodi vota abstensaun ba rezolusaun ONU nian ba situasaun iha Myanmar.
“Se karik Ministra hala’o orden ka instrusaun husi Primeiru Ministru, ami ezije Primeiru Ministru atu esplika ba povu, tanba sa mak ita-boot nia Governu bele trai povu. Nasaun sivilizadas iha mundu rai klaran nia fuan ne’ebé moos TL ohin ukun an no ohin ita-boot sai Primeiru Ministru tanba povu iha mundu tomak hatudu solidariedade ba povu TL nia luta no nia sofrimentu,” deklara portavoz MAPK Maria Imaculada Cabral liu husi konferensia imprensa iha kampus UNDIL, Maskarinas, Tersa (22/06).
Maibé, nia hatutan, karik desizaun ne’e la’os ho oden husi PM, tenke hasai Ministra Adalzija husi nia kargu.
Iha fatin hanesan Prezidente MAPK, Hugo Lourenso da Costa lamenta tanba konsidera governu TL estraga imajen estadu nian iha mundu.
“Se situasaun ne’e ita husik bebeik hahú ona destroi ita-nia relasaun bilateral no mós relasaun internasionáis, no estraga ita-nia imajen hanesan nasaun fundador ba g7+ ida ne’ebé mak Timor mehi atu lori paz no estabilidade ba mundu internasionál,” katak nia.
Molok ne’e, Estadu Timor-Leste, reprejenta husi Ministeriu Negosio Estranjeiru, sesta liu ba (18/6), partisipa iha deskusaun no negosiasaun iha Asembleia Jerál Nasoens Unidas (ONU) iha Nova Iorke hodi organiza votu ba esbosu rezolusaun kona-ba situasaun golpe militár iha Myanmar.
Reuniaun no negosiasaun realiza tanba nasaun sira iha uniaun europeia, Asean no seluk tan aprejenta esbosu rezolusaun atu halo embargo ba nasaun Myanmar.
Iha aprovasaun ba testu esbosu rezolusaun ne’e, nasaun hamutuk 119 mak vota a-favor, nasaun ditadura ida ne’ebé iha nasaun Rusia (Belarus) vota kontra no nasaun 36, inklui Timor-Leste vota abstensaun.
Ho pozisaun Timor-Leste ne’e, hetan reasaun makas husi eis Premiadu Nobel ba Pas José Ramos Horta, Parlamentu Nasionál, sosiedade sivil no akademiku sira.
Tanba ne’e, tersa horsehik (22/6) liuhusi komunikadu imprensa, MNEC onra hodi esklarese katak, hanesan país demokrátika ida, Repúblika Demokrátika Timor-Leste la apoia deklarasaun estadu emerjénsia hosi Forsas Armadas Míanmar iha loron 1 fevereiru 2021 no asaun sira tuir mai relasiona ho governu sivíl eleitu.
Pozisaun ne’e reflete ona iha deklarasaun Timor-Leste iha loron 12 fulan-Marsu 2021, durante Sesaun Konsellu Direitus Úmanus ba dala-46, iha ne’ebé Timor-Leste espresa ona ninia preokupasaun kona-ba situasaun direitus umanus iha Myanmar no husu atu liberta arbitráriu detidus, inklui mós prezus politikus. Aleinde ne’e, espresa mós apoiu tranzisaun demokrátika Myanmar no mós apela ba parte hotuhotu atu mantein diálogu no rezolve diferensias sira ho meius pasífiku.
MNEC ho onra liután hodi informa katak Timor-Leste fó ninia votu abstain ba rezolusaun refere tanba laiha pozisaun komún ho nasaun membru ASEAN sira, ne’ebé iha papél fundamentál oinsa rezolve situasaun iha Míanmar.
Iha votasaun ne’e, nasaun sira iha ASEAN, hanesan Indonesia, Myanmar rasik, Filipina, Singapura, Vietnam no nasaun sira iha CPLP, hanesan Portugal, Guine Bissau, Brazil, no seluk tan vota a-favor, Timor-Leste vota abstain.
