Diretór SAMES, Santana Martins informa, vasina AstraZeneca husi Australia aban to’o mai sei distribui kedan ba Munisipiu sira, inklui Rejiaun Espesial Oekuse Ambeno (RAEOA).
“Tuir informasaun ne’ebé ami simu katak, aban sei simu Vasina AstraZeneca husi Australia, hamutuk rihun 65 ba doze primeiru no rihun 70 ba segundu doze ne’ebé lao ona, tanba agora to’o ona tempu atu hetan segundu doze, ne’e mak ita organiza hela,”dehan nia ba Jornalista sira iha Ministeriu Finansas, Aitarak-Laran Dili, tersa ohin (29/06).
Nia hatutan, ba munisipiu Dili, aban Vasina to’o mai distribui kedan ba sentru saúde sira, inklui ho nia pakote.
“Ita labele koalia ba vasina deit, maibé iha pakote hanesan seringa, daun no alku no mós aimoruk ne’ebé ita presiza ba reasaun ne’ebé mosu hafoin simu vasina, ida ne’e iha hotu,”tenik nia.
Entretantu, total vasina ne’ebé apoiu husi nasaun parseiru sira hanesan, vasina AstraZeneca husi Covax Facility hamutuk dozes 24.000, Australia 76.800 no Sinovac husi Xina 100.000.
Asistente Editor: Saturnina da Costa
