Tuir Presidente AADPP, Inoçensio de Jesus Xavier hatete, material konstrusaun ne’ebé ajuda ba vitima dezastre naturais sira, hetan apoia orsamentu husi traballador Timor-Oan sira ne’ebé sevisu iha Australia.

Tuir nia, osan ne’ebé traballador Timor-Oan sira iha Australia haruka mai ho total hamutuk dolar amerikanu rihun $4,283.

“Material konstrusaun ne'ebe ami apoia ba familia vitima sira, kada uma kain ida hetan kalen tahan 30, semente saku 5, pregu bo’ot kada kilo 6,”dehan nia iha Aldeia Lemorana, Suku Dare, sabado (10/07).

Nia hatutan, antes ne’e sira apoia ona familia vitima sira iha Munisipiu Aileu, Manatuto, Vikeke, Lautem.

Nune’e, ohin sira apoia tan material konstrusaun ba vitima  sira iha Aldeia Lemorana.

“Iha Dili mak Ita apoia ona material konstrusaun ba vitima uma-kain hitu (7) ne’e,”tenik nia.

Apoia ne’ebé sira fó iha tipu rua, ida ajuda aimoruk ba vitima sira no apoia material konstrusaun.

Entretantu, Xefe Aldeia Lemorana, Aliçio da Costa hatete, durante inundasaun uma-kain ne’ebé hetan estragus total hamutuk 11 no sira ne’ebé hetan ameasadu hamutuk 63.

“Ohin iha vitima uma-kain 7 ne’ebé sira nia uma estragus total mak simu ona material konstrusaun no antes ne’e, iha uma-kain hat mak simu ona,”dehan Xefe Aldeia.

Enkuantu, vitima dezastre naturais Lemorana Fernando senti orgullu no agradese ba AADPP ne’ebé apoia ona sira.

Asistente Editor: Saturnina da Costa