31 Agosto: Positivu Covid-19 iha Dili Sa’e ba 119

By Agostu 31, 2021 418
Positivu Covid-19. Foto:Dok/Independente. Positivu Covid-19. Foto:Dok/Independente.

DILI: Sala Situasaun Sentru Integradu Jestaun Krize (SIJK) ohin (31/08) relata, numeru positivu Covid-19 iha Kapital Dili sa’e ba 119 kompara ho horseik (30/08) iha na’in 66.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ne’ebé relata ohin, aleinde iha Dili, iha Munispiu Baucau mós rejista kazu 20, Ainaro 3, Bobonaro 11, Covalima 1, Ermera 2, RAEOA 5 no Vikeke iha kazu 6.

“Husi kazu detetadu foun ohin, iha kazu 60 ka pursentu 40 (40%) mak hatudu sintomas. Husi positivu hirak ne’e, iha na’in 61 (37%) simu ona vasina kompletu no na’in 22 (13%) hetan ona vasina doze dahuluk,”dehan nia iha komunikadu ne’ebé Online INDEPENDENTE asesu, tersa ne’e.

Nune’e, total numeru kazu foun, ne’ebé relata ohin hamutuk na’in 167.

Aleinde, SIJK mós ohin rejista pasiente ne’ebé rekupera husi moras Covid-19 hamutuk na’in 239 no kazu ativu iha Sala Izolamentu hamutuk 4.499.

Entretantu, husi horseik (30/08) mai ohin teste PCR ne’ebé Laboratorium Nasional Saúde halo iha Dili hamutuk na’in 581, kompostu husi Vijilansia sentinela na’in 11, Contact tracing 375, Random Screening 47, Viajen sai husi serka sanitaria husi Dili 128, Viajen internasional 2 no Follow up iha kuarentena na’in 18.

Total PCR ne’ebé halo horseik (30/08) iha Munisipiu sira seluk, RAEOA no HNGV hamutuk 347. Ohin Izolamentu Vera Crus, Lahane, HNGV no fatin sira seluk iha teritoriu laran tomak, halo tratamentu ba kazu detetadu hamutuk na’in 117 kompostu husi, kazu grave na’in 19, moderadu na’in 60 no kazu leve iha na’in 38.

Husi total kazu grave na’in 19 ne’e, iha na’in 2 uza ventilador, na’in 3 uza CPAP-Continous Positive Airway Pressure no na’in 13 uza oksijéniu.

Tanba ne’e, SIJK nafatin apela ba populasaun hotu atu tuir regras prevensaun nian, hanesan fase lima bebeik ho sabaun, uza maskara no labele halibur malu barak liu na’in sanulu ba leten.

 

Asistente Editor: Saturnina da Costa

Rate this item
(0 votes)
Saturnina da Costa

Jornalista Jornal Independente

https://independente.tl

Independente Digital TV