Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, sidadaun na’in hat ne’e, hanesan ema Timor-Oan no sidadaun refere kompostu husi feto na’in ida no mane na’in tolu.

“Feto ida ho idade tinan 65, hela iha Dili, sidadaun ne’e seidauk vasina, nune’e, iha loron 24 fulan-Agostu 2021 diagnóstikadu sindroma insufisiénsia respiratória aguda (SIRA) tanba Covid-19, no hahú halo tratamento iha Vera Cruz, iha loron ne’e kedas. Matebian iha mós istória sofre moras tuberkuloze, hipertensaun diabetes. Ohin dader 03:30 matebian hakotu iis,”dehan nia iha komunikadu, kinta ne’e.

Aliende, iha mós sidadaun mane ho idade 69, hela iha Dili, simu ona vasina doze kompletu, iha loron 23 fulan-Agostu 2021 diagnóstikadu sindroma insufisiénsia respiratória aguda (SIRA) tanba Covid-19, no hahú halo tratamento iha Lahane, iha loron ne’e kedas. Matebian iha mós istória stroke hemorájiku. Ohin dader 04:30 matebian hakotu iis.

Mane ida tan, ho idade tinan 69, hela iha Dili, seiduak simu vasina, iha loron 26 fulan-Agostu 2021 diagnóstikadu sindroma insufisiénsia respiratória aguda (SIRA) tanba Covid-19, no hahú hala’o tratamento iha HNGV, iha loron ne’e kedas. Ohin dader 02:00 matebian hakotu iis.

Enkuantu, mane ida ho idade tinan 23, hela iha Vikeke, seiduak simu vasina, iha loron 25 fulan-Agostu 2021 diagnóstikadu sindroma insufisiénsia respiratória aguda (SIRA) tanba Covid-19. Ohin dader atu transfere mai Vera Cruz liu husi ambulánsia aérea, maibé metebian hakotu iis iha oras tuku 10:45 dader, ida dalan ba aeroportu Vikeke. Matebian iha mós istória sofre moras tuberkuloze.

Matebian hirak ne’e, familia kordena hela ho ekipa saúde sira atu hala’o funeral tuir protokolu ne’ebé adopta iha Timor-Leste.

Ho  nune’e, kazu foun ne’ebé relata ohin iha Kapital Dili na’in 243, Baucau 30, Aileu 2, Bobonaro 3, Ermera 7, Lautem 2, Manatuto 4, RAEOA 8 no Vikeke 8.

Husi kazu detetadu foun ohin, na’in 114 (37%) iha ona vasina kompletu no 21 (7%) hetan ona vasina doze dahuluk.

Aleinde, SIJK mós rejista pasiente rekuperadu husi Covid-19 na’in 152 no kazu ativu iha Sala Izolamentu hamutuk  4.203.

Totál Komulativu kazu konfirmadu sura husi loron 21 fulan-Marsu tinan 2020 to’o loron 26 fulan-Agostus tinan 2021 hamutuk 15.603

Nune’e, total óbitu iha Timor-Leste hamutuk 56.

Husi horiseik (25/08) mai ohin teste PCR ne'ebé Laboratóriu Nasionál Saúde halo iha Dili hamutuk 814 kompostu husi, Vijilansia sentinela na’in 34, Contact tracing 279, Random Screening 171, Viájen sai husi serka sanitária husi Dili 263, Viájen internasionál 64 no Follow up iha kuarentena 3.

Teste PCR ne’ebé halo horiseik iha Munisipiu sira seluk, RAEOA no HNGV hamutuk 420. Ohin iha Izolamentu halo trataamentu ba kazu detetadu hamutuk 66.

SIJK nafatin husu ba populasaun sira atu nafatin tuir regras ne’ebé iha, fase liman bebeik, uza maskara no labele halibur malu liu ema na’in sanulu ba leten.

Asistente Editor: Saturnina da Costa