Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo hatete, kazu foun ne’ebé deteta ohin iha Dili na’in 14, Ermera 36, no Vikeke na’in 5.
“Porporsaun kazu sintomatiku iha pursentu 7,1 (7,1 %),”dehan nia iha komunikadu, sabado ohin.
Rui esplika, kazu foun 36 husi Munisipiu Ermera, iha na’in 27 mak kontaktu besik ho kazu inisial.
Kazu 6 seluk deteta liu husi Vijilansia Sentinela, ka konsulta rutina iha Sentru Saúde.
Numeru kazu positivu ne’ebé barak husi kontaktu inisial na’in 3 hatudu katak posivalmente iha “Superspreders”(Superespallador ka ema ne’ebé hada’et fini moras ba ema barak) iha Munisipiu Ermera.
Tanba ne’e, ekipa konjunta saúde halo hela investigasaun detallu.
Nune’e, pasiente rekuperadu hamutuk na’in 57 no kazu ativu iha Sala Izolamentu hamutuk na’in 725.
Enkuantu, komulativu kazu konfirmadu sura husi loron 21 fulan-Marsu tinan 2020 to’o loron 24 fulan-Jullu 2021 hamutuk 10,337.
Husi horiseik (23/07) mai ohin teste PCR ne'ebé Laboratóriu Nasionál Saúde halo iha Dili hamutuk 608 ho detallu hanesan, Vijilansia sentinela 7, Contact tracing 211, Random Screening 59, Viájen sai husi serka sanitária husi Dili 307, Viájen internasionál laiha no Follow up iha kuarentena hamutuk 24.
Totál testes PCR ne’ebé halo horiseik (23/07) iha Munisipiu sira seluk, RAEOA no HNGV hamutuk 259 ho detalle hanesan, Baucau 51, Ermera 55, Maliana 1, Maubisse 43, RAEOA 11, Suai 6, Vikeke 57 no HNGV 35.
Totál doze vasina ne’ebé fó ona ba populasaun elijível (tinan 18 ba leten), iha teritoriu laran tomak, to’o ohin (24/07 ) dader oras 10:00 hamutuk doze dahuluk iha 266,622 (35,3 %) no doze daruak iha 79,217 (10,0 %).
Entretantu, iha izolamentu Vera Crus ohin halo tratamentu ba kazu detetadu hamutuk 15.
Enkuantu, SIJK fó hanoin ba públiku katak rezultadu sekuensiasaun genómica husi amostra 300 ne’ebé Laboratoriu Nasionál Saúde (LNS) haruka iha 14 jullu 2021 ba Peter’s Doherti Institute iha Melbourne, Australia, ho pedidu atu halo teste urjenti ba amostra balun, hatudu katak amostra husi ema nian 4 iha lineajen B.1.617.2 (Delta), variante ne’ebé preokupante, ka ‘’variant of concern’’. LNS sei hein rezultadu sekuensiasaun genómica husi amostra 296 seluk.
