Koordenadór Jeral daruak ba Kominsaun Rektrutamentu F-FDTL, Tenente Coronel Mário Baptista “Bersama” hateten, kadidatu membru F-FDTL ne’ebé adminidu ona iha lista ne’ebe taka sai iha (15/7), hamutuk 1421, liu iha selesaun dokumentu atu tuir teste tama atu inkorpora iha instituisaun F-FDTL atu servisu ba nasaun ho povu.
Nia dehan, kadidatu hamutuk 1.421 sei tuir teste hotu, maibé iha kandidatu rezervadu ne’ebé liu ona teste iha tinan 2021 hamutuk nain 116 sei tuir saude. Tanba ne’e, tuir orariu ne’ebé iha kandidatu sira sei aprezenta aan ba komisaun rekrutamentu atu halo konfirmasaun ba dokumentu kandidatu sira nian.
“Kadidatu sira ita sei fahe ba grupu rua, sei mai aprezenta sira-nia dokumentu ba komisaun sira hahu iha 24 Jullu 2022 no 5 Agostu 2022, inklui kandidatu rezervadu hamutuk 116 molok ba tuir teste iha Sentru Formasaun Treinu Metinaru,” dehan Mário iha kuartel Jeral F-FDTL, Fatuhada, Dili, horisehik.
Tanba ne’e, kadidatu sira husi munisipiu 13 inklui RAEOA sei fahe ba grupu rua no grupu dahuluk sei aprezenta aan ho dokumentu ba komisaun hahu iha loron 24 Jullu, husi munisipiu Dili, Ataúru, Likisá, Ermera, Aileu, Manatutu no Baucau.
Grupu daruak husi munisipiu Lautém, Vikeke, Manufahi, Ainaru, Bobonaru, Covalima no RAEOA ikus mak kandidatu rezervadu hamutuk 116 sei aprezenta aan iha loron 05/08 tuku 03:00 hanesan, iha Kuartel Jeral F-FDTL, Fatuhada-Dili.
“Kandidatu ida-idak sei aprenzenta aan tenke hatudu kartaun vasina dala-rua ho bom komportamentu ne’ebe renova ona inklui dokumentu sira ne’ebe hatama ona iha tinan kotuk, ita halo konfirmasaun molok sira ba tuir teste,” dehan nia.
Iha selesaun dokumentu ne’e iha 1.305 sei tuir teste médiku, psicotest, entrevista, no teste físiku hotu, maibe iha kandidatu rezervadu hamutuk 116 sei tuir deit teste saude, tanba iha tinan 2021 sira liu ona teste.
Molok ne’e Ministru Defeza (MD), Filomeno da Paixão de Jesus hateten, governu liu husi konsellu Ministru iha loron 04/07, deside aprova ona proposta rekrutamentu membru F-FDTL foun hamutuk 600 iha tinan 2022, maibe taka sai fali deit lista naran kadidatu F-FDTL ne’ebe liu ona selesaun iha tinan 2021 mak sei tuir teste.
