Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Rui Maria de Araujo hatete, kazu foun ne’ebé relata husi Kapital Dili 130, Bobonaro na’in 15, Covalima 5, Manatuto na’in 3 no Vikeke na’in 3.
“Husi kazu ohin iha mane na’in 86 no feto na’in 70. Sira ne’ebé ho idade 12 mai kraik iha na’in 3, idade 12 to’o 59 iha na’in 150 hanesan ho pursentu 96,1 no idade 60 ba leten iha na’in 3,”dehan nia iha komunikadu, domingo ohin.
Ho nune’e, total kazu detetadu foun ohin proporsaun kazu sintomátiku hamutuk pursentu 10,8. Kazu rekuperadu 122 no kazu ativu iha Sala Izolamentu hamutuk 2,542.
Komulativu kazu konfirmadu sura husi loron 21 fulan-Marsu tinan 2020 to’o loron 23 fulan-Maiu hamutuk 5637.
Entretantu, kazu óbitu ne’ebé relata ohin, iha feton na’in 2 kompostu husi feto na’in ida ho idade 73 sidadaun Timor-Oan.
Bainhira hetan isin-manas, mear maran, iis-boot, diagnostikadu ho pneumonia matebian ba halo tratamentu iha Óspital Nasionál Guidu Valadares (HNGV) iha loron 13 fulan-Maiu tanba, no deteta SARS-CoV2 ho Cycle Threshold (CT) N gene 23,6, c gene 23,8, liu husi teste Swab.
Matebian iha istória diabetes ho komplikasaun neuropatia diabétika.
Tanba ne’e , iha (13/05) kalan, ekipa konjunta saúde tranporta mai iha Sala Izolamentu Vera Cruz hodi halo tratamentu ho oksijéniu iha kánula.
Hafoin iha loron 15 fulan-Maiu kontinua ho tratamentu oksijéniu liu husi CPAP (Continuous Positive Airway Pressure) iha ICU, maibé tanba saturasaun oksijéniu nafatin la-sufisiente, médiku intensivista deside halo ventilasaun asistidada liu husi ventiladór.
Enkuantu kontinua ho tratamentu ba diabetes no mós tratamentu seluk ba sindroma insufisiénsia respiratória aguda (SIRA).
Iha sabado (22/05) kalan oras 07:55 matebian hakotu iss tanba multiple organ failure (orgaun lubuk-ida iha isin lafunsiona).
Familia kordena ona ho ekipa SIJK atu halo hala’o funeral tuir protokolu ne’ebé iha.
Feto na’in 1 ho idade 52 sidadaun Timor-oan hotu, matebian moras iha uma semana 2 ona, iha istória diabetes, tensaun-aas, no problema tiróide. Hafoin hetan moras iss-bo’ot ba halo tratamentu iha HNVG iha loron 21 fulan-Maiu.
Iha HNGV diagnóstikadu nu’udar sindroma insufisiénsia respiratória aguda (SIRA), rezultadu teste PCR hatudu positivu ho CT N2 gene 38,4 & E gene 37,3.
Matebian transferida ba fatin Izolamentu Vera Cruz iha kedas loron ne’e, hahú tratamentu oksijéniu liu husi CPAP (Continuous Positive Airway Pressure) iha ICU, maibé tanba saturasaun oksijéniu nafatin lasufisiente, médiku intensivista deside halo ventilasaun asistidada liu husi ventiladór, no kontinua tratamentu ba nia kondisaun saúde sira seluk.
Ohin dader (23/05) oras 09:15 matebian hakotu iis tanba multiple organ failure(orgaun lubuk-ida iha isin lafunsiona).
Familia kordena ona ho ekipa SIJK atu hala’o funerál tuir protokolu ne’ebé iha.
Husi horiseik (22/05) mai ohin (23/05) teste PCR ne'ebé Laboratóriu Nasionál Saúde halo iha Dili hamutuk 685 ne’ebé kompostu husi, Vijilánsia sentinel na’in 3, Contact tracing na’in 116, Random Screening na’in 158, Viájen sai husi serka sanitária husi Dili hamutuk 377, Viájen internasionál iha na’in 6 no Follow up iha kuarentena hamutuk 25.
Totál testes PCR ne’ebé halo horiseik(22/05) iha Munisipiu sira seluk, RAEOA no HNGV hamutuk 418, ne’ebé kompostu husi, Baucau iha na’in 50, Ermera na’in
47, Maliana na’in 66, Maubisse na’in 58, Suai na’in 81, Vikeke na’in 48 no HNGV na’in 68.
Izolamentu Vera Cruz ohin (23/05) halo tratamentu ba kazu positivu hamutuk na’in 33, husi numeru ne’e na’in 7 grave.
Asistente Editor: Saturnina da Costa
