Koordenadora Jeral Surtu Covid-19 iha Ministeriu Saúde, Dra. Odete da Silva Viegas, hatete, sidadaun feto ida neebé mate nee, ho idade 50 no seidauk simu vasina.
“Tuir informasaun matebian refere, tama iha emerjensia iha loron 18 fulan-fevereiru 2022, ho Dx: DM Type 2 + Covid-19 no ohin dader iha tuku 06:15 hakotu iis,” dehan komunikadu neebé Online INDEPENDENTE asesu, kuarta nee (23/02).
Ho nunee, tuir dadus, total sidadaun neebé mate ho Covid-19 iha fulan fevereiru 2022, hamutuk na’in haat (4).
Enkuantu, total komulativu kazu konfirmadu óbitu sura husi tinan 2020 too 2022 hamutuk 126.
Entretantu, kazu pozitivu foun Covid-19 neebé relata ohin (23/02) iha na’in 43 no kazu ativu iha na’in 901.
Aleinde, iha mós kazu rekuparadu hamutuk na’in 78.
Entretantu, iha oras 24 nia laran teste PCR neebé Laboratoriu Nasional Saúde halo iha Dili hamutuk na’in 423, kompostu husi, vijilansia sentinel na’in lima, rastreiu ba kontaktu iha na’in 175, rastreiu ba aleiatoriu iha na’in 146, viajen internasional na’in 86 no follow up iha kuarentina na’in 11.
Aleinde, teste PCR neebé halo iha munisipiu sira seluk, inklui RAEOA no HNGV hamutuk 160.
Haree ba kazu neebé kada loron rejista, Ministeriu Saúde apela ba populasaun iha Díli laran no mós iha Munisípiu sira seluk, atu aprezenta-an iha fasilidade saúde (Sentru Saúde ka Ospitál) neebé besik, bainhira sente isin-manas, kakorok moras, inus-ben, ka mear, hodi bele hetan atendimentu husi profisionál saúde sira.
Nunee mós, Ministeriu Saúde husu ba populasaun sira iha Timor-Leste laran tomak, maski simu ona vasina kompletu, maibé nafatin respeita regra prevensaun no ijiéne individual, ne’ebé Governu hatuur ona, atu prevene moras Covid-19 da’et ba mai.
