Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ne’ebé deteta ohin, iha Kapital Dili na’in 77, Covalima 63, Baucau 6, Ainaro 8, Aileu 5, Bobonaro 3, Ermera 4, Lautem 6, Manatuto 2, Manufahi 5 no Vikeke 8.
“Kazu detetadu foun ohin, iha na’in 125 ka 66,8% mak hatudu sintomas, nune’e iha na’in 40 (21,3%) hetan ona vasina kompletu no 56 (30,0%) hetan ona vasina doze dahuluk,”dehan nia iha komunikadu, segunda ohin (23/08).
Nune’e, pasiente rekuperadu ohin hamutuk 67 no kazu ativu iha sala izolamentu hamutuk 3.383.
Enkuantu, totál Komulativu kazu konfirmadu, sura husi loron 21 fulan-Marsu tinan 2020 to’o loron 23 fulan-Agostus tinan 2021 hamutuk 14.403.
“Óbitu ne’ebé relata ohin, iha mane na’in ida ho idade tinan 68, hanesan sidadaun Timor-Oan hela iha Postu Administrativu Gleno, Munisipiu Ermera.
Nune’e, iha loron 16 fulan-Agostu tinan 2021, hetan diagnóstikadu Covid-19 (PCR pozitivu, CT Egene 22, N2gene 24,7), iha Gleno, Ermera no hahú hala’o izolamentu iha loron 17 fulan-Agostu 2021.
Aliende, matebian iha mós problema hipertensaun. Hahú iha loron 17-Agostu, pasiente nia saturasaun oksijénio la normal no hahú hatudu sinál sindroma insufisiénsia respiratória aguda (SIRA), maibé matebian ho familia lakohi atu transfere mai halo tratamentu iha Dili.
Nune’e, ohin madrugada matebian isin manas, saturasaun oksijéniu tuun-maka’as no matebian hakotu iis iha oras tuku 11:20 dadeer.
Tanba ne’e, familia la aseita hala’o funeral tuir protokolu ne’ebé adopta iha Timor-Leste
Enkuantu, totál óbitu iha Timor-Lestehamutuk na’in 49.
Entretantu, husi horiseik (22/08) mai ohin teste PCR ne'ebé Laboratóriu Nasionál Saúde halo iha Dili hamutuk 238 ne’ebé kompostu husi, vijilánsia sentinela na’in 1, contact tracing 106, random Screening 23, viájen sai husi serka sanitária husi Dili 99, viájen internasionál 4 no follow up iha kuarentena na’in 5.
Teste PCR ne’ebé halo horiseik (22/08) iha Munisipiu sira seluk, RAEOA no HNGV hamutuk 354 no Izolamentu Vera Crus ohin, halo tratamentu ba kazu detetadu na'in 60.
Asistente Editor: Saturnina da Costa
