Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu positivu foun iha Dili nafatin rejista as, kompara ho Munisipiu sira seluk.

Husi kazu detetadu 39, iha Dili na’in 20, Baukau na’in 8, Bobonaro na’in 4, RAEOA na’in 6 no Vikeke na’in 1.

“Husi kazu detetadu ne’e, na’in 22 ka 56,4% mak hatudu sintomas, na’in 7 ka 18% simu ona vasina doze kompletu no na’in 7 ka 8% simu ona vasina doze dahuluk,” dehan nia iha komunikadu ne’ebé Online INDEPENDENTE asesu, domingo ne’e.

Aleinde, SIJK mós rejista pasiente ne’ebé rekupera husi Covid-19 hamutuk na’in 251 no kazu ativu ne’ebé baixa hela iha Izolamentu hamutuk 1.675.

Totál komulativu kazu konfirmadu sura husi loron 21 fulan-Marsu tinan 2020 to’o loron 19 fulan-Setembru tinan 2021 hamutuk 19.033.

Ba kazu mate, Rui relata, sidadaun Timor-Oan mane ida ho idade 75, hela iha Dili no seidauk hetan vasina, diagnóstikadu iha Óspital Nasional Guido Valadares (HNGV) ho Sindroma ho Insufisiénsia Respiratória Aguda (SIRA) tanba Covod-19, iha loron 13 fulan-Setembru tinan 2021.

Nune’e, iha sabado (18/09) kalan tuku 23.10 pasiente hakotu-iis iha Izolamentu Vera Crus.

Familia kolabora ho ekipa saúde hodi hala’o funeral tuir protokolu ne’ebé adopta iha Timor-Leste.

Ho nune’e, tuir dadus husi SIJK ema ne’ebé mate ho Covid-19 iha TL hamutuk 104.

Entretantu, husi horseik (18/09) mai ohin teste PCR ne’ebé Laboratoriu Nasional Saúde halo iha Dili hamutuk na’in 167, kompostu husi, Vijilansia sentinela na’in 7, Contact tracing na’in 11, Random Screening na’in 9, Viajen sai husi serka sanitaria iha Dili na’in 59, Viajen internasional 24 no follow up iha kuarentena na’in 57.

Nune’e, teste PCR ne’ebé Laboratoriu Nasional Saúde halo iha Munisipiu sira seluk, RAEOA no HNGV hamutuk 268. Iha 19 fulan-Setembru Izolamentu Vera Crus, Lahane, HNGV no fatin sira seluk halo tratamentu hospitalizadu ba kazu detetadu hamutuk 59, kompostu husi kazu grave na’in 7, kazu moderadu na’in 35 no kazu leve iha na’in 17.