Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo hatete, kazu foun ne’ebé deteta ohin iha Dili na’in 11 no Vikeke na’in 3.
“Kazu detetadu foun ohin, iha mane na’in 9 no feto 5, kazu sira ne’e hotu asintomatiku ka la hatudu sintomas,”dehan nia iha komunikadu, segunda ohin.
Nune’e, pasiente rekuperadu hamutuk na’in 30 no kazu ativu iha Sala Izolamentu hamutuk na’in 766.
Enkuantu, komulativu kazu konfirmadu sura husi loron 21 fulan-Marsu tinan 2020 to’o loron 19 fulan-Jullu 2021 hamutuk 10,142.
Husi horiseik (18/07) mai ohin teste PCR ne'ebé Laboratóriu Nasionál Saúde halo iha Dili hamutuk 298 ho detallu hanesan, Vijilansia sentinela laiha, Contact tracing 16, Random Screening 1, Viájen sai husi serka sanitária husi Dili 159, Viájen internasionál 84 no Follow up iha kuarentena hamutuk 38.
Totál testes PCR ne’ebé halo horiseik (18/07) iha Munisipiu sira seluk, RAEOA no HNGV hamutuk 114 ho detalle hanesan, Baucau 36, Ermera 16, Maliana 4, Maubisse 25, RAEOA 9, Suai 7, Vikeke 9 no HNGV 20.
Totál doze vasina ne’ebé fó ona ba populasaun elijível (tinan 18 ba leten), iha teritoriu laran tomak, to’o ohin (19/07 )dader oras 10:00 hamutuk doze dahuluk iha 250,644 (33,2%) no doze daruak iha 56,627 (7,5%).
Entretantu, iha izolamentu Vera Crus ohin halo tratamentu ba kazu detetadu hamutuk 13, iha Obstetrisia na’in 3, Medisina interna na’in 7 no iha Sirurjia na’in 3.
Asistente Editor: Saturnina da Costa
