Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, sidadaun ne’ebé mate hanesan Timor-oan, hela iha Munisipiu Ermera, hafoin moras enkamiña mai iha Óspital Nasional Guido Valadares (HNGV), iha loron 5 fulan-Agostus tinan 2021, ho diagnóstika sindroma insufisiénsia respiratoria aguda (SIRA), tanba hetan moras Covid-19 (PCR positivu ho CT E gene 33,3).
“Iha fatin Izolamentu Vera Crus hala’o tratamentu ho ventilasaun asistida, maibé iha kuarta (18/08) meia-noite hetan xoke séptiku no falénsia orgaun barak (multiple orgaun failure), hafoin matebian hakotu iis,”dehan nia iha komunikadu, kinta ne’e.
Nune’e, familia kordena ona ho ekipa saúde atu hala’o funeral tuir protokolu ne’ebé adopta iha Timor-Leste.
Enkuantu, kazu foun ne’ebé relata ohin, iha Dili 185, Manufahi 41, Bobonaro 4, Manatuto 8, RAEOA 21, Likisa 18, no Vikeke 13.
“Kazu detetadu foun ohin, iha na’in 140 ka 40,4% mak sintomátiku. Iha idade tinan 20 mai kraik na’in 55 (19,7%), idade entre 12-59 iha na’in 215 no idade 60 ba leten na’in 8,”tenik nia.
Ho nune’e, pasiente rekuperadu loron ohin hamutuk 55 no kazu ativu hamutuk 2.729.
Totál Komulativu kazu konfirmadu sura husi loron 21 fulan-Marsu tinan 2020 to’o loron 19 fulan-Agostus tinan 2021 hamutuk 13.433.
Totál komulativu óbitu iha Timor-Leste hamutuk na’in 41.
Entretantu, husi horiseik (18/08) mai ohin teste PCR ne'ebé Laboratóriu Nasionál Saúde halo hamutuk 866 kompostu husi, vijilansia sentinela na’in 44, contact tracing 427, random screening 99, viájen sai husi serka sanitária husi Dili 262, viájen internasionál laiha no follow up iha kuarentena na’in 34.
Aleinde, teste PCR ne’ebé halo horiseik (18/08) Munisipiu sira seluk, RAEOA no HNGV hamutuk 326 no Izolamentu Vera Cruz ohin halo tratamentu ba kazu detetadu hamutuk na'in 60, iha area obstetrisia na’in 14 kategoria leve hotu, medisina interna na’in 37 kompostu husi na’in 17 kategoria grave, 1 uza ventilador, 16 ho oksijéniu, 19 kategoria moderadu no na’in 1 kategoria leve.
Aleinde, iha sirurjia na’in 6 kategoria leve hotu no pediatria na’in 3 kategoria leve.
Tanba ne’e, SIJK nafatin pela ba populasaun sira nafatin regra prevensaun no ijiéne individuál ne’ebé Governu hatuur ona, uza maskara, fase liman ho sabaun ka uza dezinfekta ruma, evita kose liman ba matan, inus no ibun no mós labele halibur malu barak.
Asistente Editor: Saturnina da Costa
