Husi dadus ne’e, kompostu husi idozus 88,919 no defisiensia 8,725, no orsamentu ne’ebé atu halo pagamentu benifisiáriu sira hamutuk $22,141,674.00.
Ministra Solidariedade Sosial no Inkluzaun (MSSI), Verónica das Dorres hatete, INSS hamutuk ho MSSI sei implementa pagamentu pensaun sosiál, ba faze dahuluk tinan 2024 hahú iha loron 18 falan-Marsu iha teritóriu nasional.
Ministra dehan, benifisiáriu ne’ebé ho idade hahú husi tinan 60-69 hamutuk 28,890 sei simu osan ho montante $60 ho idade 70-79 hamutuk 44,045 sei simu osan $80 no benifisiáriu ho idade 80 ba leten hamutuk 15,978 ne’ebé sei simu osan $100 ba kada ema ida.
“Dadus benisfisiáriu ba pensaun sosiál ferik katuas no Ema ho Defisiensia (EhD) ne’ebé sei simu liu husi banku komersiál sira iha Timor-Leste hanesan, Banku Nasionál Komérsiu Timor-Leste (BNCTL) hamutuk 97,139, Banku Nasionál Ultramariñu (BNU) iha na’in 222, Banku Repúbliku Indonézia (BRI) iha 226 no Banku Mandiri na’in 57,” katak Ministra.
Governante esplika, benifisiáriu ne’ebé iha ona konta bankaria ne’ebé sei hetan pagamentu liu husi ATM hamutuk na’in 15,249 no benifisiariu ne’ebé simu pagamentuho konta bankaria direta hamutuk 82,395.
“ba benifisiáriu pensaun sosiál ne’ebé utiliza kartaun ATM BNCTL ka utiliza banku seluk mak banku sei halo pagamentu fulan-fulan, no ba benifisiáriu BNCTL ne’ebé sei trata kartaun ATM ka la iha posibilidade tanba distánsia, pagamentu sei halo kada fulan tolu (3),” Ministra hato’o.
Entertantu, iha tinan 2024, INSS rejistu benifisiáriu foun hamutuk na’in 1,406 husi totál ne’e na’in 119 mak loke ona konta bankaria no na’in 1,287 seidauk loke konta bankaria.
Tan ne’e, husu ba autoriedade kompetente atu bele aviza ba benifisiáriu sira ne’ebé seidauk iha konta bankaria hafoin banku halo pagamentu iha faze tuir mai.