Enkuantu, sidadaun na’in lima ne’e kompostu husi adultu na’in 2 no inan isin rua hamutuk ho bebe iha na’in 3.
“mane ida ho idade 41 hela iha Ermera, diagnostikadu iha loron 9 fulan-Agostu tinan 2021, ho sindroma insufisiénsia respiratória aguda (SIRA), tanba Covid-19 (Teste PCR nia resultadu pozitivu, Cycle Threshold: E gene 31,7).
Metebian iha istória anemia krónika tan bá Multiple Mieloma (tipu ida husi leusemia).
Transfere ba Vera Cruz iha loron ne’e kedas no hala’o tratamentu tuir protokolu tratamentu ba Covid-19. Maiz ou menus iha oras tuku 17:00 loron 16 fulan-Agostus, matebian hakotu iis tanba multiple organ failure.
Teste PCR hafoin iis-kotu nafatin pozitivu (CT E gene 19,6; N 21,3).
Nune’e, familia kordena ona ho ekipa saúde atu hala’o funeral tuir protokolu ne’ebé adopta iha Timor-Leste,”dehan nia iha komunikadu, tersa ne’e.
Aleinde, iha mós feto ida ho idade 37, enkamiña husi HNGV, iha loron 12 fulan-Agostu tinan 2021, ho diagnóstiku G2P1A0 (isin-rua daruak, tu’ur-ahi dala ida, la iha istoria abortu), isin-rua semana 40, ho mós diagnostiku Covid-19 (CT 27), ho sintomas respiratorius.
Nune’e, iha loron 16 fulan-Agostu kalan, hahu prosesu tu’ur-ahi, maibé iha oras tuku 01:00 dader, loron 17 fulan-Agostu 2021, inan isin rua ne’e hakotu iis tanba amnion liquid embolia. Oan iha inan nia kanotak mós la salva. Familia kordena hela ho ekipa saúde atu hala’o funeral tuir protokolu ne’ebé adopta iha Timor-Leste.
Entretantu, IUFD (bebé mate iha inan nia kanotak) husi inan isin-rua G3P1A1, ho idade semana 28. Inan iha kondisaun estável, maibé ho diagnostiku Covid-19.
Iha mós IUFD (bebé mate iha inan nia kanotak) husi inan isin-rua G4P2A1, semana 33. Inan sintomatiko ho diagnostico Covid-19, agora kondisaun estável, hahú iha loron 12 fulan-Agostu 2021.
Nune’e, tuir dadus total ema ne’ebé mate ho Covid-19 hamutuk na’in 38.
Enkuantu, kazu foun Covid-19 ba loron hamutuk 247, kompostu husi Dili 192, Ermera 24, Bobonaro 12, RAEOA 12, Manatuto 1 no Baucau 6.
Rui relata, kazu detetadu foun ohin, iha na’in 96 ka 38,9% mak sintomátiku.
Nune’e, pasiente rekuperadu ohin hamutuk 37 no kazu ativu iha izolamentu na’in 2.349 no mós izolamentu Vera Cruz halo tratamentu ba kazu detetadu na'in 48.
Asistente Editor: Saturnina da Costa
