Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, numeru kazu detetadu foun ohin, iha Kapital Dili na’in 109, Baucau na’in 17, Aileu na’in 2, Ainaro na’in 5, Bobonaro na’in 2, Covalima na’in 2, RAEOA na’in 8 no Vikeke iha na’in 4.

“Husi kazu detetadu foun ohin, iha kazu na’in 40 (25,3%) mak hatudu sintomas. Husi positivu hirak ne’e iha na’in 36 (23%) hetan ona vasina kompletu no iha na’in 24 (15%) mak sei hetan vasina doze dahuluk,”dehan nia iha komunikadu, ne’ebé Online INDEPENDENTE asesu kuarta ne’e.

Nune’e, SIJK mós ohin rejista pasiente ne’ebé rekupera husi moras Covid-19 hamutuk na’in 466, enkuantu kazu ativu ne’ebé baixa hela iha Izolamentu hamutuk 3.631.

Total komulativu kazu konfirmadu sura husi loron 21 fulan-Marsu tinan 2020 to’o loron 8 fulan-Setembru tinan 2021 hamutuk 18.046.

Rui esplika, sidadaun Timor-Oan mane na’in ida ne’ebé ohin mate, ho idade 60 no seidauk simu vasina.

Ho nune’e, iha loron 5 fulan-Setembru tinan 2021 diagnóstikadu iha HNGV ho sindroma insufisiénsia respiratória aguda (SIRA) tanba Covid-19. Iha loron ne’e kedas matebian hala’o tratamento iha Izolamentu Lahane. Nune'e, matebian hakotu-iis ohin dadeer tuku 3:52 oras Timor-Leste. Familia kolabora ho ekipa saúde, atu hala’o funeral tuir protokolu ne’ebé adopta iha Timor-Leste.

Tuir dadus husi SIJK, total ema ne’ebé mate ho Covid-19 hamutuk 86.

Entretantu, husi horiseik (07/09) mai ohin teste PCR ne'ebé Laboratóriu Nasionál Saúde halo iha Dili hamutuk 495, kompostu husi Vijilánsia sentinela na’in 75, Contact tracing na’n 83, Random Screening nain 105, Viájen sai husi serka sanitária husi Dili na’in 132, Viájen internasionál na’in 12 no Follow up iha kuarentena iha na’in 88.

Aleinde, teste PCR ne’ebé halo horiseik (07/09) iha Munisipiu sira seluk, RAEOA no HNGV hamutuk 420 no ohin iha Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk 89 kompostu husi kazu grave na’in 17, kazu moderadu na’in 56 no kazu leve iha na’in 16.