01 Outubru: Positivu Covid-19 Foun iha 37 Featured

By Outubru 01, 2021 394
Rejultadu hatudu positivu Covid-19. Foto:Dok. Rejultadu hatudu positivu Covid-19. Foto:Dok.

DILI: Sala Situasaun Sentru Integradu Jestaun Krize (SIJK) ohin (01/10) relata, ekipa konjunta saúde rejista tan kazu foun Covid-19 hamutuk na’in 37.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo hatete, numeru kazu detetadu foun reduz kompara ho loron horseik (30/09) iha kazu 43 no mate rua.

Husi kazu detetadu 37 ne’e, iha Kapital Dili na’in 10, Baukau na’in 20, Bobonaro na’in 4, Manufahi na’in 1 no RAEOA na’in 2.

“Husi kazu detetadu ne’e, iha kazu 14 mak hatudu sintomas, kazu 9 simu ona vasina  doze kompletu no kazu 5 simu ona vasina doze dahuluk,”dehan nia iha komunikadu ne’ebé Online INDEPENDENTE asesu, sesta ne’e.

Aleinde, SIJK mós rejista pasiente ne’ebé rekupera husi moras Covid-19 iha na’in 56 no kazu ativu ne’ebé baixa hela iha Izolamentu hamutuk na’in 744.

Nune’e, total komulativu kazu konfirmadu sura husi loron 21 fulan-Marsu tinan 2020 to’o loron 01 fulan-Outubru tinan 2021 hamutuk na’in 19.398.

Entretantu, husi horseik (30/09) mai ohin teste PCR ne’ebé Laboratóriu Nasional Saúde halo iha Dili hamutuk na’in 209, kompostu husi Vijilansia sentinela na’in 1, Contact tracing na’in 1, Random screening na’in 36, Viajen sai husi serka sanitaria Dili na’in 11, Viajen internasional na’in 149 no follow up iha kuarentena hamutuk na’in 11.

Enkuantu, teste PCR ne’ebé halo iha munisipiu sira seluk, RAEOA no HNGV hamutuk na’in 242. Kazu detetadu ne’ebé hala’o tratamentu iha Izolamentu Vera Crus, Lahane no HNGV hamutuk na’in 37, kompostu husi kazu grave na’in 5, kazu moderadu na’in 25  no kazu leve na’in 7.

Rate this item
(0 votes)
Saturnina da Costa

Jornalista Jornal Independente

https://independente.tl

Independente Digital TV