Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araujo hatete, kazu foun ne’ebé relata ohin, iha mane na’in 30 no feto na’in 38.
Kazu detetadu foun ohin iha na’in 32 sintomatiku, hanesan ho pursentu 47,1 (47,1%).
Ho nune’e, pasiente rekuperadu ohin hamutuk na’in 22 no kazu ativu iha sala izolamentu hamutuk 1.026.
Totál Komulativu kazu konfirmadu sura husi loron 21 fulan-Marsu tinan 2020 to’o loron 01 fulan-Agostus tinan 2021 hamutuk 10.966.
Husi horiseik (31/07) mai ohin teste PCR ne'ebé Laboratóriu Nasionál Saúde halo hamutuk 300, ho detallu hanesan, Vijilánsia sentinela laiha, Contact tracing 135, Random Screening 5, Viájen sai husi serka sanitária husi Dili 159, Viájen internasionál 1 no Follow up iha kuarentena laiha.
Totál testes PCR ne’ebé halo horiseik (31/07) iha Munisipiu sira seluk, RAEOA no HNGV hamutuk 124 ho detalle hanesan tuirmai, Baucau 50, Ermera laiha, Maliana 6, Maubisse 15, RAEOA 15, Suai 24, Vikeke 3 no HNGV 29.
Entretantu, totál doze vasina ne’ebé fó ona ba populasaun elijível (tinan 18 ba leten), to’o ohin (01/08) dadeer oras 10:00, tuir Sistema Informasaun Sáude iha Ministériu Saúde, iha teritoriu Timor-Leste ba doze dahuluk hamutuk 289.068 (38,3%) no doze daruak hamutuk 99.057 (13,12%).
Atu bele hatene surtu ida ninia evolusaun, nomós surtu ne’e aumenta ka diminui, indikador ida ne’ebé matenek-nain epidemiolójia nian uza, maka insidénsia.
Konvensionalmente insidénsia sukat totál kazu foun kada loron pur 100 mil abitante no hatudu risku ne’ebé populasaun iha atu hetan da’et moras ida.
Insidénsia Munisipiu Ermera nian maka a’as-liu; (2) Munisipiu tolu – Ermera, Dili, Viqueque mak iha risku bo’ot liu atu populasaun hetan da’et, no hada’et tutan virus SARS-CoV-2, iha komunidade nia le’et.
Enkuantu, evolusaun surtu Covid-19 iha Munisipiu Ermera durante semana ida ikus nia laran, númeru kazu pozitivu hahú aumenta maka’as iha Munisipiu Ermera, iha 24 jullu 2021, to’o ohin (01/08), Munisipiu Ermera iha kazu ativu hamutuk 523 (51%) husi total kazu ativu nasional.
Husi total kazu pozitivu ohin 49, iha 30 (62,2%) mak hatudu sintomás.
Munisipiu Ermera ninia kobertura vasina, to’o ohin dadeer tuku 10h00: 12,9% deit ba primeira doze no segunda doze 1,41% deit. Kobertura ida ne’e, maka ki’ik-liu ona entre munisipiu sira hotu iha Timor-Leste nia laran tomak.
Nune’e, ohin iha izolamentu Vera Cruz halo tratamentu ba kazu detetadu na'in 20.
Informasaun adisional,
aproveita fó hanoin ba públiku katak Konsellu Ministrus deside ona atu impoin serka sanitária ba Munisipiu Ermera, no konfinamentu domisiliar jeral ba Postu Administrativu Ermera ho Railaku.
Informa mós ba populasaun tomak katak ema ne’ebé simu ona vasina doze daruakhasoru virus SARS-CoV-2, naran vasina ida, husi hirak ne’ebé rekoñesidu husi Organizasaun Mundiál Saúde bele ona sirkula livremente tama ka sai serka sanitária, la presiza hetan autorizasaun esepsionál husi Diretor Sentro Integradu jestaun Krize, bele mós sirkula livremente iha fatin hirak ne’ebé Governu deside atu impoin konfinamentu domisiliar jeral. Presiza deit hatudu provas kona-ba hetan ona vasinasaun kompletu.
Asistente Editor: Saturnina da Costa
