Katuas ne’ebé identifika ho naran José Pereira babain hala’o atividade buka hahaan fahi nian iha foer-fatin iha Dili laran ne’e la imajina dadeer ne’e bainhira nia sai husi nia hela fatin iha Kampung Alor ho karosa nia sei hetan bebé ida.

José informa, nia sai husi uma iha tuku 07:30 no bainhira to’o iha fatin-foer ida iha Markoni nia hare plastiku mean ida kesi metin no so’e hela iha foer-fatin.

“Ha’u hi’it plastiku ne’e todan loos. Ha’u hanoin ne’e hahaan restu, entaun ha’u kore plastiku ne’e, haree ba bebé ida maibe mate tiha ona,” informa nia fatin akontesimentu, Markoni, Kuarta (05/09).

Hakfodak ho buat ne’ebé nia hetan, José bolu ema sira ne’ebé besik no ikus mai polisia forensik mai hodi lori ba ospital nasionál Guido Valadares.

Xefe Suku Prontu Tama-sai Uma

Xefe Suku Fatuhada, Marcelino Soares, lamenta ho asaun imoral ne’ebé halo husi ema ne’ebé laiha responsabilidade.

Tan ne’e, Xefe Suku ne’e dehan, nia sei revista kada uma iha Suku Fatuhada hodi identifika see mak so’e bebé refere.

“Ha’u prontu responsabiliza tama-sai uma iha Fatuhada hodi halo revista. Ema ne’e sei iha ne’e”, dehan nia.

Espoza PR Triste

Entretantu, espoza Prezidente Repúblika Francisco Guterres Lu Olo, Cidalia Mouzinho Nobre Guterres, sente triste tanba feto sira so’e bebé iha foer-fatin.

“Ha’u hanesan inan ha’u sente triste, ha’u sente la’os ha’u mesak mak triste maibé ha’u fiar ema hotu-hotu triste bainhira haree ema soe bebé,” dehan nia.

Tanba kazu so’e bebé akontese bebeik ona, tuir nia, komponente hotu-hotu presiza tuur hamutuk hodi haree ninia kauza.

Tuir espoza PR ne’e, familia, estadu, no governu presiza atu foti ida-idak ninia kna’ar ho di’ak.

“Liu-liu hanesan inan-aman iha uma laran fó nafatin lia-fuan ba ona sira liu husi maneira kada familia ida-idak nian,” dehan nia.

Maske lamenta ho hahalok ne’e, maibé Cidalia husu nafatin atu parte kompetente labele hanoin de’it medida sansaun maibé tenke buka hatene mós problema saida mak halo ema liu-liu feto sira soe sira-nia bebé.

“Problema ne’ebé mosu bainhira soe bebé ne’e nia kauza barak tebe-tebes. Balun tanba ransu livre mak sai hanesan ne’e, balun tanba nia ekonómia,” dehan Cidalia.

Nia hatutan, ransu livre dala-barak halo ema haluha katak buat ne’ebé nia halo bele estraga nia futuru no mós estraga ninia saúde rasik.

“Ida-idak mak lori nia aan oinsa atu tau aan ne’e ho dignu. Lalika hasara moris ema seluk nian ne’ebé liu husi dalan la lo’os maibé moris naton ho saida mak iha,” nia afirma.

Ba kestaun ne’e, nia dehan, papel husi inan-aman importante tebes. Tan ne’e inan-aman tenke iha koñesimentu hodi bele hafahe ba nia oan sira no inan-aman mós tenke sai modelu ne’ebé di’ak ba nia oan sira.

“Tanba inan-aman mak sai espelu di’ak (ba oan sira),” katak nia.