Iha kongresu ne’e, kongresista sira aprezenta lista pakote kandidatura sekretáriu jerál tolu, ne’ebé reprezenta husi Adérito Hugo da Costa iha Pakote A, Francisco Kalbuadi Lay iha pakote B no pakote C mak Dionísio Babo Soares.

Maski nune’e, iha prosesu eleisaun, pakote A no C ne’ebé aprezenta Adérito Hugo no Dionísio Babo la hatudu kompetetivu, tanba votu husi Kalbuadi nian soe dook kandidatu rua seluk.

Votu válidu ba pakote Francisco Kalbuadi nian hamutuk 530, entretantu Adérito hetan votu 188 no Dionísio hetan votu 195. Iha mós votu nulu 73 no branku 7.

Lista pakote ho estrutura kompletu mak hanesan tuir mai; pakote A, Prezidente CPN, Xanana Gusmão, Vise CPN I, Hermenegildo 'Agio' Pereira, Vise CPN II, Germano da Silva Pereira, Vise CPN III, Domingas Alves da Silva ‘Bilou Mali’, Vise CPN IV, Natalino dos Santos, Vise CPN V, Delfina da Costa Simões, Vise CPN VI, Marcos Fuka. Sekretáriu Jerál, Adérito Hugo da Costa, Vise Sekjen I, Amandio de Sá Benevides, Vise Sekjen II, Júlio Tomás Pinto, Vise Sekjen III, Angela M. Carvelo.

Pakote B mak; Prezidente CPN, Xanana Gusmão, Vise CPN I, António da Costa Bukar Mau-Huno, Vise CPN II, Virgílio Smith, Vise CPN III, Maria Rosa da Câmara Maria “Bisoi”, Vise CPN IV, Tomás do Rosário Cabral, Vise CPN V, Bendito dos Santos Freitas, Vise CPN VI, Francisco da Costa ‘Ikulay’. Sekretáriu Jerál, Francisco Kalbuadi Lay, Vise Sekjer I, Jacinto Rigoberto de Deus, Vise Sekjer II, Francisco Guterres, Vise Sekjer III, Jacinto Viegas Vicente ‘Roque’.

Pakote C mak hanesan; Prezidente CPN, Xanana Gusmão, Vise Prezidente CPN I, Virgílio Smith, Vise Prezidente CPN II, Eduardo Barreto ‘Dusae’, Vise Prezidente CPN III, Duarte Nunes, Vise Prezidente CPN IV, Jacinto Viegas Vicente ‘Roque’, Vise Prezidente CPN V, Januário Pereira, Vise Prezidente CPN VI, Arão Noe de Jesus. Sekretáriu Jerál, Dionísio Babo, Vise Sekjer I, Jacinto Rigoberto, Vise II, Idelta Rodrigues, Vise III, António Guterres.

Iha biban ne’e, Sekretáriu Jerál CNRT eleitu, Francisco Kalbuadi Lay hateten, hakarak kandidata-aan tanba mai ho vizaun no misaun ida hodi tau aas interese nasionál no lori partidu CNRT ba manan maioria iha eleisaun parlamentár oin mai.

“Ha’u kandidata-aan tanba hakarak atu hatutan maun boot nia mehi, atu haburas liu tan partidu CNRT tinan ba tinan, ba ita ba joven no ba oan no bei-oan sira hotu atu partidu eziste nafatin”, tenik iha, iha kongresu CNRT ba dala tolu, iha Sentru Konvensaun Dili (SKD), Segunda (1/5).

Atu atinje mehi partidu nian mak sekretáriu jerál eleitu sei kria komunikasaun no koordenasaun ho lider partidu husi nasionál to’o iha baze atu bele manan maioria iha eleisaun parlamentár.

Nia hatutan, partidu CNRT partidu boot iha Timor ne'ebé povu maioria fó fiar hodi lidera nasaun ne’e, maibé iha lei eleisaun ezije atu partidu sira tenke prienxe kritériu tanba ne’e sei haka'as aan no husu kuadru militante hotu atu bele servisu hamutuk hodi lori partidu ba oin.

“Ha'u sei kompromete atu harii mós sede iha postu sira,” tenik nia.

Iha fatin hanesan, kandidatu na’in rua ne’ebé lakon Adérito Hugo no Dionísio Babo mós promete sei kontinua servisu hamutuk nafatin hodi konsolida militante sira atu fó votu ba partidu CNRT bele kaer ukun.