Desizaun ne’e Governu foti, hafoin analiza aprezentasaun husi Sala Situasaun Sentru Integradu Jestaun Krize (SIJK) kona ba situasaun epidemolójika surtu Covid-19 iha Timor-Leste.
“Konsellu Ministrus (KM), kuarta ohin (25/08) aprova projetu Rezolusaun Governu ne’ebé impoin konfinamentu domisilariu jerál ba populasaun iha munisípiu Dili, hahú iha oras 00:00 loron 27 fulan-Agusto to’o oras 23:59 loron 2 fulan-Setembru tinan 2021,”dehan Ministru Prezidensia Konsellu Ministru Fidelis Leite Magalhães, iha Palasiu Governu.
Iha biban hanesan, Governu mantein konfinamentu domisiliariu jerál ba populasaun iha Postu Administrativu Ermera no Railaco, iha Munisípiu Ermera, to’o oras tuku 23:59, loron 1 fulan-setembru.
Nune’e, impoin konfinamentu dimisiliáriu jerál ba ema hotu ne’ebé hela ka agora daudaun iha Munisípiu Dili, ne’ebé tenke hela iha sira-nia uma ka iha alojamentu temporáriu, inklui sentru akollamentu, exetu iha situasaun ne’ebé prevee iha diploma ne’e, liuliu tanba razaun saúde, serbisu, asesu ba sasán no servisu nesesidade bázika nian no simu vasina kontra Covid-19.
Nia hatutan, bandu mós sirkulasaun iha área hotu munisípiu Dili nian, bandu transporte públiku, liuliu táxi, mikrolete, biskota no anguna halo sirkulasaun.
Aleinde, suspende selebrasaun relijioza koletiva no bandu mós atu hala’o serimónia fúnebre ne’ebé envolve partisipasaun ema na’in sanulu liu, no sira ne’ebé durante iha serimónia ne’e rasik tenke uza máskara oin nian hodi taka inus no ibun no mantein distánsia, pelumenus metru ida ho ema seluk ne’ebé prezente iha serimónia ne’e.
Enkuantu, estabelesimentu komersiál, industriál, artezanál ka prestasaun servisu nian taka ba públiku, ho exesaun ba estabelesimentu sira ne’ebé autoriza iha Rezolusaun Governu ne’e, liuliu estabelesimentu ne’ebé fa’an ai-han no sasán nesesidade bázika nian, eletrisidade, telekomunikasaun, prestasaun kuidadu médiku, farmásia, postu kombustivel nian, no instituisaun finanseira sira.
Restaurante sira bele fornese hahán iha rejime take away ka entrega iha uma de’it no estabelesimentu sira-seluk ne’ebé taka ba públiku bele dezenvolve nia atividade liu husi servisu entrega ba uma de’it.
Nune’e, vendedór ambulante ba sasán alimentár no sasán ba nesesidade bázika bele mantein sira-nia atividade. Merkadu sira munisípiu nian hanesan, Manleuana no Taibessi mantein nia funsionamentu, husi oras tuku 6 dadeer to’o tuku 6 loro-kraik.
Entretantu, tuir dadus husi SIJK to'o ohin (25/08), komulativu kazu konfirmadu hamutuk 15.296, kazu komulativu óbitu hamutuk na'in 52 no kazu ativu iha izolamentu hamutuk na'in 4.052.
Asistente Editor: Saturnina da Costa
