Presidente PN, Arão Nóe de Jesus hatete, kada tinan tuir prosesu normál iha 15 Outubru Governu sempre aprezenta orsamentu, maibé iha tinan ida liu ba ne’e la akontese, tanba ne’e ninia impaktu mai to’o agora.
“Husu ba VIII Governu Konstitusionál atu lori mai ninia OJE 2019 iha 15 Outubru ita bele halo ona audiénsia públiku, (debate) ba jeneralidade no espesialidade. Ita bele kalkula iha 20 Dezembru 2018 molok tama Natál orsamentu bele aprova ona iha finál globál”, dehan nia, iha Uma Fukun PN, horisehik.
Nia hatutan, kuandu hetan ona aprovasaun iha PN atu promulga ka lae ne’e kompeténsia Presidente Repúblika nian, tanba ne’e karik promulga iha Marsu 2019 hanesan ne’e bele hala’o ona ezekusaun hodi halo dezenvolvimentu tuir programa ne’ebé orsamentu ona.
Nia hatete, OJE 2018 ne’ebé aprovadu ona sei normaliza hikas mákina estadu no hala’o fali roda ekonomia iha rai laran iha fulan haat oin mai, atu nune’e iha OJE 2019 ne’e governu tau osan hodi fokus ba dezenvolvimentu.
Aprezentasaun OJE 2018 ne’ebé debate iha Agostu no Setembru nia laran ne’e nunka mais akontese iha prosesu konstrusaun estadu hahú iha primeiru governu mai to’o iha VII governu.
Atu garante situasaun ne’e labele akontese hikas maka governu tenke hahú halo ona planu atu nune’e iha tempu ne’ebé hanesan mai aprezenta ona ninia orsamentu.
