Mantolun ne’ebé antes ne’e fa’an ho presu $3 kada porta (rak), agora daudaun sa’e ona ba $5.

“Baibain ha’u mai sosa mantolun rak ida $3, maibé agora folin sa’e derrepente ba $5. Ida ne’e ha'u mós la komprende”, dehan kompradór Maria Araújo, iha Audian horisehik.

Iha fatin ketak, komprador Virgínia Teresa hatete, presu sasán nesesidade báziku sira folin normál ona, maibé úniku mantolun mak presu sei sa’e.

“Presu mantolun antes ne’e $.3.50, maibé agora sa’e ba $.4.50”, tenik nia.

Hataan ba kestaun ne’e, Koordenadór Autoridade Inspesaun Fiskalizasaun Ekonomia Sanitária Alimentár (AIFESA), Abílio Oliveira, seidauk iha informasaun tanba parte inspesaun seidauk relata.

Maski nune’e, sira mós halo ona estabelesimentu hodi haree ba presu, tanba iha diploma Dekretu Lei númeru 29/2011 mak regula ba presu justu.

Nia dehan, presu justu ne’e mak regula ba bens esensiál nesesidade báziku no no konstrusaun materiál sira bele fa'an tuir merkadu livre, maibé iha tabela presu justu ne’e labele liu 10%.

Kuandu liu ida ne’e mak halo ona infrasaun kontra diploma ne’e, distribuidór sira obrigatoriu tenke fó invoice ne'ebé sira sosa. Se sira la fo selu multa kuandu fó bazeia ba invoice ne'ebé sosa hodi hasae lukru liu 10%.

“Mantolun folin sa’e ami seidauk hatene, tanba AIFESA ba halo inspesaun tenke bazeia ba lei ida”, tenik nia.

Nia dehan, sé mak hasa’e sasán folin liu 10% mak sei fó multa koima $5.000 too $10.000. Kestaun mantolun nia presu sa'e ida ne’e presiza atu hatene sira sosa hira no fa'an presu hira? Liu 10% ka lae.

Observasaun diáriu ne’e iha terrenu katak, stock mantolun iha supermerkadu sira iha parte Audian nia hanesan W-Four, Star King, Loja Maun-Alin, no loza xineza sira daudaun ne’e presu mantolun sa'e.

No folin nesesidade báziku iha supermerkadu no mini market folin normál, terigu kg ida $1, mantolun rak ida $4, Mina litru 5 folin $5, foos 25kg $12, foos 30kg $15.