Deputadu PN, Arão Noe dehan, bainhira Timoroan mete jogu SDSB ne’ebé familiár ho naran, Susah Dapat, Senan Beli (SDSB) sei halo na'in ba SDSB maka sei ‘bokur’ no povu sei la hetan edukasaun di’ak, tanba loron-loron toba hadeer hanoin no konta mehi di’ak para sosa númeru.

“Ha’u nia hanoin, jogu kasino ne’e nia impaktu makas, tanba povu Timor -Leste agora ne’e povu jogadór ne’e orijen duni. Ha’u la'ós akuza povu ne’e lae. Antes ne’e sira envolve ona iha joga karta no futu manu sira ne’e,”dehan deputadu Arão ba INDEPENDENTE iha Uma Fukun PN, horisehik.

Nia dehan, ohin loron ema baruk servisu no hanoin atu joga de’it para hetan osan boot.

Tuir nia katak, psikolojia, jogu SDSB ne’ebé ohin loron fa’an iha bairru ho kapitál nasaun ne’e fó edukasaun ida la di’ak ba futuru labarik ki'ik sira.

Tuir deputadu ne’e katak, se iha família uma kain ida maka, inan no aman loro-loron hanoin buka jogu de’it, dala ruma fó impaktu mós ba labarik sira.

Deputadu ne’e hatutan, maski patraun SDSB, kada fulan selu taxa ba estadu, maibé morál-mente jogu ne’e la eduka ema.

“Ita fó lisensa hodi loke jogu boot hanesan kasino ne’e governu tenke kontrola,” tenik nia.

Fatin hanesan, Deputada, Jacinta Abucau  husu atu governu tenke kontrola didi’ak jogu ne’e.

Tuir informasaun hosi fontes balun haktuir katak, kada semana ida hosi jogu SDSB ne’e Mauhoka hetan rendimentu rihun $40.

Too notísia ne’e hatún, INDEPENDENTE tenta konfirma preokupasaun deputadu ne’e, Patraun Jogu SDSB, Mauhoka, maibé seidauk hetan resposta klaru.