Vise-Ministru Saúde, Bonifácio Maucoli dos Reis hateten, MS prepara ona CPV invoice, nune’e hein transfere orsamentu halo pagamentu ba ospitál tolu ne’ebé Governu anteriór kontrata hodi halo tratamentu ba timoroan sira.

“Ospitál sira ne’e ita sei rezolve no remata fulan Outubru nia laran atu halo pagamentu ba dívida sira ne’e”, dehan nia, iha servisu fatin, Kaikoli, horisehik.

Nia dehan, oras ne’e dívida iha Ospitál Sangla-Bali hela rihun $800, nune’e ospitál rua seluk iha Malázia ho Singapura hahú ona transferénsia orsamentu, tanba CPV ba ospitál rua ne’e remata ona.

Ne’e duni, MS promete katak inísiu Novembru pagamentu ba dívida sira iha ospitál tolu ne’e sei remata, ne’ebé OJE 2019 Governu foku ba programa prioridade ne’ebé iha hodi implementa programa.

Totál dívida Ospitál Malázia, Singapura ho Indonézia hamutuk montante tokon $2.4.