Iha enkontru ne’e Datuk Edward Ong relata ba Xefe-de-Estadu kona-ba prosesu investimentu ne’ebé Grupu Pelican Paradise sei halo iha area Tasi Tolu, ne’ebé tuir planu, sei okupa rai hektares 554.

Investimentu ho totál osan Dolar Amerikanu 700.000.000 ne’ebé nia prosesu hahú kedas iha tinan-2008 ne’e, sei harii iha Tasi Tolu, Otél fitun-lima ida, Sentru Komersiál ida, Kampu Golf, Eskola no Ospitál ho padraun internasionál, Sentru Dezenvolvimentu Juventude inklui reflorestasaun ba foho-lolon ektare 350 iha Tasi Tolu.

Tuir Datuk Edward Ong, atu hahú implementa projetu ida ne’e sira presiza halo akordu espesiál investimentu ho Governu Timor-Leste hodi haree pontu lubuk ida, liuliu relasiona ho lei, aspetu sosiál-ekonómiku, ambientál no oinsá atu hasai ema hamutuk 1.800 resin ne’ebé oras ne’e okupa hela área ne’ebé sei implementa projetu refere.

Iha faze konstrusaun projetu ne’e sei presiza traballadór hamutuk ema 1.500 no sei emprega progresivamente ema iha kada tinan.

Diretór TradeInvest Timor-Leste, Arcanjo da Silva hatete esbosu akordu espesiál Investimentu entre Grupu Pelican Paradise ho Governu kompleta ona no hein de’it aprezenta ba Konsellu Ministru liu hosi Ministériu kompetente.

Prezidente-da-Repúblika Francisco Guterres Lú Olo enkoraja Grupu Pelican Paradise ne’ebé investe ona iha Timor-Leste no husu atu kolabora di’ak ho Governu, iha implementasaun projetu sira ne’e.

Xefe-de-Estadu mós hameno atu investimentu sira ne’ebé grupu ne’e halo, bazeia ba regra no la’o tuir lei ne’ebé vigora iha Timor-Leste.