Sekretáriu Estadu Juventude no Desportu, Nélio Isaac Sarmento hateten, Governu prepara ona OJE 2018 plafond tinan ida nian montante biliaun $1.2 submete ona Parlamentu Nasionál atu halo diskusaun iha tempu badak.
Nune’e, iha diskusaun ne’e mós Primeiru Ministru, Taur Matan Ruak, hamutuk ho membru Governu sira hahú halo planu ba OJE 2019 nian.
“Iha enkontru ne’e ami ko’alia sobre oinsá preparasaun atu lori orsamentu ba PN hodi diskute OJE 2018 ne’ebé di'ak liután,” dehan Nélio, hafoin enkontru Konsellu Ministru, iha Palasiu Governu, horisehik.
Nia hatutan, aprezentasaun OJE 2018 iha Parlamentu Nasionál, Primeiru Ministru, Taur Matan Ruak, rasik hamutuk ho membru Governu sei marka prezensa hodi diskute.
Nune’e, bainhira enkontru Konsellu Ministru remata Governu submete kedas OJE 2018 ba PN, hodi nune’e tempu badak hahú diskute, maibé atu determina tempu ne’e kompeténsia tomak husi Parlamentu Nasionál.
Tanba ne’e, iha OJE 2018 Governu tau prioridade oinsá asegura mákina estadu hodi selu funsionáriu sira iha saláriu vensimentu no bens servisu, inklui pagametu ba dívida ne’ebé tula hela mai Governu nia leten.
Alende ne’e, Konsellu Ministru mós halo planu ba OJE 2019, ne’ebé sei halo planu ba despeza no hasa’e ba reseita naun petrolíferu, atu diminui dependénsia ba reseita ba dependénsia reseita petrolíferu, nune’e esforsu Governu hasa’e kresimentu ekonómiku no reduz kiak ho kria kampu servisu.
