Vise-Ministru Transporte Telekomunikasaun (VMTT), Inácio Freitas Moreira hatete, Governu sei halo verifikasaun kle'an ba dívida Timor Telecom nian antes atu selu.

Nia esplika, estatutu Timor Telecom agora sai empreza privadu, tanba ne’e depende ba administrasaun ninian.

“Ha’u hanoin ami tenke halo verifikasaun depois mak bele selu, maibé governu ida ne’e kualkér dívida ne'ebé iha sei haree fila-fali para tenke tama ho prosesu legál hafoin bele halo desizaun”, dehan Inácio hafoin simu pose, iha Palásiu Prezidensiál, Tersa (3/10).

Tuir nia, dívida ne’e nei sei rona informalmente de’it, presiza iha legalidade no karta ruma katak iha duni dívida. Maski nune’e, sei haree hodi diskute buka solusaun.

Antes ne’e, iha VI Governu Konstitusionál, liu husi reuniaun Konsellu Ministru hasai ona rezolusaun ba ministériu hotu-hotu atu kada ministériu tenke responsabiliza dívida telekomunikasaun nian.

Eis-Vise-Ministru Finansas (MF), Hélder Lopes hateten, instituisaun ne’ebé sei iha dívida sira tenke ba verifika, depois koordena direita ho Timor Telecom para atu rezolve dívida ho sira nia osan rasik.

Totál dívida kompañia telekomunikasaun nian ba Governu iha kustu hira nia la hatene, tanba ministériu ida-idak ninia responsabilidade.

Nune'e, ba eis Membru Governu sira ne'ebé utiliza nafatin telemovel Estadu nian ne'e kabe ba kompeténsia Sekretáriu Estadu Konsellu Ministru nian.