Presidente CCI-TL, Óscar Lima hatete, projetu 142 ne’ebé iha governu anteriór fó emprezáriu nasionál sira implementa ne’e balun remata ona balun seidauk.
Iha Orsamentu Jerál Estadu (OJE) 2018 ne’ebé aprova ona hodi hein Prezidente Repúblika atu promulga, hanesan meiu ida oinsá atu funsiona mákina estadu oinsá mós atu hakbiit ekonomia rai laran liu husi investimentu públiku.
Iha investimentu públiku emprezáriu nasionál sira barak brani investe ho nia osan 5% husi totál osan projetu nian atu garante ba governu hodi implementa obra ne’e.
Ba projetu 142 ne’ebé ohin loron sai hanesan pontu interrogasaun ne’e emprezáriu sira tau ona ninia osan hodi halo konstrusaun tanba hetan adjudikasaun direita husi governu anteriór.
Kuandu governu halo adjudikasaun direita husu kompañia atu implementa projetu ruma, nune’e kompañia ne’e hetan autorizasaun sira fiar metin hodi lori osan 5% ne’e sai hanesan garante ba projetu.
“Husu ba polítiku na'in sira atu halo polítika iha Parlamentu Nasionál maibé tenke hanoin povu nia-moris”, dehan nia iha knaar fatin, Akait-Dili, Sesta (14/9).
Nia hatete, projetu sira ne’e implementa tanba Governu maka fó garantia, tanba ne’e atu tuir regra ka lae, labele fó sala ba emprezáriu sira maibé tenke halo levantamentu ida oinsá bele rezolve.
Projetu ne’e barak finaliza ona maibé emprezáriu balun seidauk selu ninia traballadór sira to’o agora tanba osan laiha osan, hein governu atu halo pagamentu maibé laiha kuaze tinan ida resin ona.
Ne’e duni, prosesu ne’e la'ós afeta de’it ba emprezáriu sira maibé mós povu ki'ik sira ne’ebé servisu ba iha projetu ne’e hotu.
Óscar konkorda PN atu halo inkéritu parlamentár hodi halo levantamentu dadus ba pagamentu projetu, la'ós atu halo inkéritu atu la selu. Karik iha levantamentu ne’e maka balun no seuk laiha maka sei hamate emprezáriu nasionál.
Nia hatete, polítika governu hakarak atu dezenvolve ekonomia iha rai-laran, entaun emprezáriu nasionál mai sai hanesan parseiru. Tanba ne’e, husu ba governu buka meius solusiona problema ne’e oinsá atu labele halakon parte ida.
