Governadór BCTL, Abraão Vasconcelos hatete, programa akumala oan tahan US$ 1 ne’e hahú kedan ona iha 2013 hafoin lansa moeda foun Timor nian sentavu 100.

Lansamentu moeda foun no retira osan tahan dolar amerikanu nu’udar programa sistemátiku husi BCTL. Nune’e, sei hamenus osan tahan amerikanu nian fazeadamente.

Osan ne’ebé sei iha sirkulasaun Banku Sentrál husik nia kontinua, maibé kuandu tama ba banku sentrál no komersiál sira ne’e labele sai fali, tanba Timor mós iha tan ona sentavu 200.

“Osan tahan USD$ 1 ne’e la’ós ilegál seidauk tama mai (banku sentrál) husik nia kontinua sirkula ba ”, tenik nia, iha servisu fatin, Sesta (9/2).

Aleinde ne’e governadór ne’e mós informa, kona-ba sirkulasaun osan falsu iha sira nia parte seidauk identifika. Uluk akontese duni, maibé balun haruka ona ba iha ministériu públiku hodi prosesa.

Osan falsu ne’ebé antes ne’e identifika nia montante la boot liu, bele dehan normál hela.

Oras ne’e daudaun sirkulasaun osan falsu atu tama iha Timor-Leste sei difisil, tanba kuaze banku hotu-hotu monta ona sistema hodi halo identifikasaun ba sirkulasaun osan falsu.