Husi númeru ne’e, iha labarik na’in 56 mak mate ona ho dengue.

Tuir komunikadu ne’ebé Online INDEPENDENTE, asesu, iha pajina MS, relata, husi total númeru kazu ne’ebé rejista, maioria husi Kapital Dili ho kazu hamutuk 3.604.

Aleinde, husi munisipiu Ermera iha kazu 118, Manatuto iha kazu 175, Baukau iha kazu 331, Manufahi iha kazu 211, Lautem iha kazu 164, Líkisa iha kazu 154, Kovalima iha kazu 149.

Ho nune’e, iha munisipiu sira ne’ebé kazu dengue rejista ho númeru kiik mak hanesan, Aileu ho kazu 85, Vikeke ho kazu 83, Ainaro ho kazu 45 no Rejiaun Administrativu Espesial Oekuse Ambeno (RAEOA) ho kazu neen (6).

“Em jeral kazu dengue espalla ona iha teritoriu Timor laran tomak,”refere komunikadu.

Tuir komunikadu, idade ne’ebé afetadu liu mak idade husi tinan 5 to’o 14 ho total 41,8% no idade 1-4 iha 35,6%. Nune’e, Attack Rate (AR), idade 1-14 no nivel nasional ho 0,9%.

Enkuantu, kazu mate iha inisiu fulan-Jeneiru to’o mai juñu tinan ne’e iha na’in 56 mak mate, ida ne’e reprezenta case fatality rate nivel nasional ho 1,1%.

Entretantu, husi númeru kazu ne’ebé rejista kada loron, MS husu ba populasaun sira atu nafatin hamoos uma ninin no fatin sira ne’ebé susuk tolun ba no mós husu ba populasaun sira bainhira senti isin manas, liman ain kolen, favor hakbesik ba sentru saúde ne’ebé besik atu hetan tratamentu.