Print this page

TL-Australia Komitmentu Prioritiza Ratifikasaun Akordu Fronteira Marítima Featured

By Jullu 30, 2018 7164
Ministru Negósiu Estranjeiru no Kooperasaun, Dionísio Babo Soares ho Ministra Negósiu Estranjeiru Australia, Julie Bishop MP halo konferensia ba imprensa hafoin hasoru malu, segunda-feira (30/7), iha MNEC. Foto: Gabinete MNEC Ministru Negósiu Estranjeiru no Kooperasaun, Dionísio Babo Soares ho Ministra Negósiu Estranjeiru Australia, Julie Bishop MP halo konferensia ba imprensa hafoin hasoru malu, segunda-feira (30/7), iha MNEC. Foto: Gabinete MNEC

DILI:Governu Australia ho Timor-Leste ho komitementu forte hodi kontinua tau prioridade ba ratifikasaun akordu fronteira maritima.

Iha deskusaun entre Ministru Negósiu Estranjeiru no Kooperasaun, Dionísio Babo Soares ho Ministra Negósiu Estranjeiru Australia, Julie Bishop MP, diplomata na’in rua ne’e apresia asinatura istóriku ba Tratadu entre Austrália ho Timor-Leste ne’ebé estabelese Fronteira Marítima iha Tasi Timór (Akordu Fronteira Marítima) iha Nova Iorke, iha loron 6 fulan-Marsu 2018.

Hafoin hasoru malu, segunda-feira, iha salaun VIP, Ministériu Estranjeiru Negósiu no Kooperasaun, Babo reafirma Timor-Leste nia komitimentu forte ba orden-bazeia ba regras internasionál no apresia Tratadu Fronteira Marítima no utilizasaun Komisaun Konsiliasaun independente UNCLOS nian hanesan testamentu ida kona-ba oinsa lei internasionál bele fasilita solusaun pasífika ba disputa sira.

Entretantu, Ministra Julie konsidera komitmentu sira ba kapítulu foun ida iha relasaun bilaterál ne’ebé sei hametin lasu no hakle’an liután kolaborasaun entre Timor-Leste no Austrália.

Nia rekoñese katak amizade entre nasaun rua ne’e metin tebes. Timor-Leste ho Australia halo komitmentu atu hafoun hikás parseria iha futuru, la’ós foka de’it ba iha relasaun bilaterál maibé foka mós iha servisu hamutuk iha rejiaun Indo-Pasífiku no iha mundu globál.

Timor-Leste ho Australia reafirma sira nian komitmentu ba parseria ida ne’ebé bazeia ba respeita mútua no fiar malu.

Ministru Negósiu Estranjeiru no Kooperasaun Timor-Leste, Dionísio Babo Soares, PhD.simu Honorável Julie Bishop MP, Ministra Negósiu Estranjeiru Austrália, husi loron 29 to’o 31 fulan Jullu, iha Díli.

Programa vizita, Julie Bishop hasoru malu ho Prezidente Repúblika, Francisco Guterres Lú Olo, Primeiru Ministru, Taur Matan Ruak no mós lider opozisaun, Dr. Marí Alkatiri no vizita projetu balun ne’ebé hetan tulun husi Australian Aid.

 

Rate this item
(0 votes)
Last modified on Tersa, 31 Jullu 2018 08:30
Jose Sarito Amaral

Latest from Jose Sarito Amaral