Kuarta, 03 Juñu 2020 | Login
Ponte Weru Koco iha Lautem Tohar Ponte Weru Koco iha Lautem Tohar

Ponte Weru-Koco Besik Monumentu Apikuru Lautem Tohar Featured

DILI: Ponte Weru-Koco ne’ebé liga estrada nasional Diresaun Dili-Lospalos ohin (22/5), madrugada tohar, tanba kauza husi udan boot ne’ebé akontese kuaze oras 24 nia laran.

Ponte ne’e lokaliza iha Suku Baduru, Postu Administrativu Lautem, besik Monumentu Apikuru (Monumentu Masakre 25 Setembru 1999).

Tuir Komunidade Januario Fernandes Xavier (Job) hatete, iha Lautem horikalan udan kuaze loron ida tomak, mota boot hodi estraga tiha ponte ne’e.

Ponte Weru-Koco ne’e ho luan besik metru 100, bainhira ponte ne’e tohar laiha dalan alternativu atu fasilita transporte públiku diresaun Lospalos-Dili.

“Ponte ne’e tohar ona, movimentu púbiku husi Lopalos ba Dili labele la’o ona, agora karreta ho motor para hotu iha ne’e, atu liu mos dalan alternativu laiha ona,”dehan nia, liu husi telefone, Sesta ohin.

Job dehan, ponte ne’e ninia aliserse sei metin hela, maibé alkatraun ne’ebé tutan ponte ne’e maka mota sobu kuaze metru neen.

Tanba ne’e husu ba Governu liu-liu Ministériu Obras Publika (MOP), apoia lalais ekipamentu pezadu balun atu bele buka dalan alternativu seluk hodi bele fasilita movimentasaun transporte públiku nian, atu nune’e komunidade sira bele lori ninia produtu lokal ba merkadu.

Entertantu nia informa, akontesimentu mota boot ne’e konsege estraga mós komunidade sira nia plantasaun iha toos laran, nomos lori komunidade nia motor rua.

Hatan ba kestaun ne'e Diretór Jerál Obras Publika (MOP), Rui Hernani hatete, ponte ne'ebé mota sobu, ne'e hanesan obra ida iha prosesu konstrusaun dalan nasional liga ba munisipiu.

Tanba ne'e parte MOP sei haruka kompaña ne'ebé kaer obra ne'e bele toma asaun, ho nesesariu no imediatu, hodi solusiona pontu ne'e hodi garantia nafatin movimentasaun públiku nian.

Read 2453 times
Rate this item
(1 Vote)