Desizaun ne’e foti hafoin Xefe Estadu Maior Jeneral F-FDTL, Maijór Jeneral Lere Anan Timur hasai despaisu iha loron 3 Maiu 2019.

Komandante Komponente Formasaun no Treinamentu F-FDTL, Tanente Koronel Celestino Pinto “Daeleba” hatete, Komando F-FDTL deside hodi demite JSBM ho diviza Segunda Sarjentu iha Komponente Formasaun Metinaro husi F-FDTL.

“Hasai membru militar ida inisial JSBM idade tinan 32 husi funsaun sira hotu ne’ebé durante iha vida militar hodi fila ba vida sivil,” deklara Daeleba liu husi konferensia imprensa iha Kuartel F-FDTL Metinaru, Segunda (27/05).

Tuir Tanente Koronel Daeleba, JSBM hatudu ona hahalok la disiplina dala tolu no hetan ona prizaun disiplinar dala tolu tutuir-malu.

“JSBM hetan tiha ona prizaun disiplinar dala tolu tutuir-malu ho infrasaun ne’ebé hanesan,” dehan nia.

Ho hahalok ne’ebé JSBM halo, Komando deside hodi demite nia husi F-FDTL hodi fila fali ba vida sivil.

Ba kazu deskonfia naok bibi, Komandante ne’e dehan pesoal F-FDTL ne’e hatudu hahalok ne’ebé afeta tebes ba prestijiu instituisaun nian.

“(hahalok) ne’e afeta tebes ba prestijiu instituisaun F-FDTL nian kona-ba Honra Brio ka Decoro Militar nian.”