Tersa, 07 Abril 2020 | Login
Presidente Parlamentu Nasional Presidente Parlamentu Nasional

Arão Preparadu Husik kargu

DILI: Prezidente Parlamentu Nasionál (PN), Arão Noe de Jesus, preparadu fizikamente no psikolojikamente bainhira koligasaun foun mai hakarak halo mudansa ba kompozisaun meza PN.

Arão dehan, hanesan ema polítika sempre preparadu ba situasaun saida de'it, maibé importante mak tenke tuir rejimentu no regra Parlamentu Nasionál ne’ebé iha.

Tanba Prezidente PN kargu ida ema maioria deputadu parlamentár mak fó atu ezerse to’o loron. Bainhira seluk mai hakarak asume fali kargu ne’e dalan demokrasia mak ne’e.

“Ha'u la hanoin sente manas no sente malirin ba asuntu ne’e. Ha'u kualkér momentu de’it hanesan ema polítiku prontu responsabilidade. Ne’ebé troka ohin ka aban ne’e normál,” dehan Arão, iha Parlamentu Nasionál, horisehik.

Tuir nia, titulár deputadu durante tinan lima (5) to’o eleisaun ruma mak foin nia mandatu ne’e hotu, maibé Prezidente PN ho Estrutura no mós Prezidente Komisaun, buat sira ne’e depende ba konfiansa maioria husi deputadu sira.

Nia hatutan, mandatu ne’e mai serve deit, kargu ne’e ema seluk nian, entaun iha kualkér momentu ema seluk troka fali.

“Bele troka ne’e ha’u kontente liu, tanba ha’u sente katak servisu ne’e todan liu, Segunda to’o Sesta, dadeer to’o lokraik tenke prontu iha ne’e, maibé hanesan deputadu la’ós, see iha ajenda mak mai, see laiha ajenda, ha'u bele ba haree ha'u-nia toos no haree ha'u nia servisu,” dehan nia.

Tanba ne’e, tuir Arão prosesu demokrasia normal mak hanesan ne’e, bele entre bankada sira seluk mak husu, bele mós hanesan akontese tiha ona 2016 kuandu bankada sira asina hodi troka eis Prezidente PN, Vicente Guterres, CNRT mós asina proponente ne’ebé laiha impaktu.

Iha fatin hanesan, Deputadu Bankada Partidu Demokrátiku (PD), Adriano do Nascimento hateten, faktu rejimentu iha, Aliansa Mudansa ba Progresu (AMP) husi partidu tolu CNRT, PLP, no KHUNTO, maibé sira fahe malu ona, agora iha ona koligasaun foun.

“Hanesan esperiénsia pratika ne’ebé mosu iha parlamentu nasionál, uluk 2016 laiha anin no laiha udan, Partidu CNRT hasai PD. Ha'u iha Vise-Prezidente Parlamentu no hasai Prezidente Parlamentu Vicente Guterres husi CNRT rasik, muda hotu meza parlamentu,” dehan nia.

Tuir Adriano, iha tempu ne’ebá koligasaun foun laiha, CNRT mesak mak ukun kontinua governu ne’e to’o hotu, maibé hasai partidu PD no Frente Mudansa (FM).

“Ha'u hanoin dalan pratika parlamentu iha ona, satán agora iha ona koligasaun foun, agora ita hein de'it Prezidente Repúblika halo nia kompeténsia,” dehan nia.

Nia hatutan, uluk la to’o Prezidente Repúblika hasai PD, nune’e hili meza parlamentu foun, satan agora. Ne’e duni, mosu kompozisaun foun ka lae depende planu polítiku no vontade polítiku ukun.

Entretantu, Prezidente Bankada CNRT, Duarte Nunes hateten, konjuntura iha koligasaun foun mak sei determina, tanba iha koligasaun entaun sira hakarak fatin ne’ebé nia membru envolve. Tanba ne’e, dala ruma sei akontese.  

Read 65 times
Rate this item
(0 votes)
MidAd1