Kuarta, 03 Juñu 2020 | Login
Loron Primeiru ba Aniceto Guterres Lidera Reuniaun Lider Bankada, hafoin Eleitu Nudar PPN iha loron Tersa feira liu ba. Dili Kinta, (21/05). FOTO:INDEPENDENTE/Jonio da Costa Loron Primeiru ba Aniceto Guterres Lidera Reuniaun Lider Bankada, hafoin Eleitu Nudar PPN iha loron Tersa feira liu ba. Dili Kinta, (21/05). FOTO:INDEPENDENTE/Jonio da Costa

Primeiru Enkontru Lider Bankada Sira, PD Partisipa, CNRT Auzente Featured

DILI: Hafoin hetan konfiansa votu maioria parlamentár husi bankada haat, FRETILIN, PLP, KHUNTO no PD, Presidente Parlamentu Nasionál foun, Aniceto Guterres konvoka kedas primeiru enkontru ho lider bankada sira.

Iha primeiru enkontru ho lider bankada sira, kinta ohin (21/5) ne’e la hetan partisipasaun deputadu husi partidu CNRT. Enkuantu partidu sira seluk hanesan bankada FRETILIN, PLP, KHUNTO no PD marka prezensa.

Prezidente Parlamentu Nasionál, Aniceto Guterrres, hatete prioriadade liu mak halo funsionamentu Parlamentu Nasionál.

“Ohin atu komesa hahú par normaliza funsionamentu Parlamentu Nasionál nian, tanba Parlamentu ita labele husik hela hanesan ne’e sasan estraga mais prontu buatu hotu liu tiha,”dehan nia, iha Parlamentu Nasionál, Kinta (21/05).

Nia dehan, molok konvoka enkontru ho lider bankada sira, Prezidente Parlamentu ne’e hasoru uluk ona ho nia vise na’in rua.

Entretantu responde kona-ba bankada CNRT nia auzente iha enkontru lider bankada sira ne’e, Prezidente Bankada CNRT, Duarte Nunes hatete, Bankada CNRT la parsipa iha enkontru lider bankada sira, tanba hein  hela rezultadu rekursu ne’ebé hatama ona ba Tribunál Rekursu.

“Ami só depois Tribunal Rekursu fó nia desizaun illegal ka legal ida ne’e mak ami foin deside atu partisipa (enkontru Lideres Bankada) ka la’e,”dehan nia.

Nia dehan, prosesu iha hotu iha Tribunál Rekursu, agora hein de’it desizaun.

“Mais laos ami boikota, mais prontu ne’e ami nia direitu, ami halo ona rekursu ba Tribunál Rekursu, depois ami partisipa fali ami nia pozisaun ne’e oinsá. Ne’e kestaun prinsipiu,”dehan nia.

Enkontru lider bankada sira ne’e, hetan partisipasaun mós husi membru Sekretáriu Estadu Komunikasaun Sosial, Mericio Juvinal dos Reis “Akara”.

Nune’e mós enkontru lider bankada sira ne’e la partisipa husi bankada CNRT, PUDD, UDT no Frente Mundansa.

Deputadu Bankada CNRT maske mai iha Parlamentu Nasionál, maibé sira iha de’it sala Bankada.

Read 300 times Last modified on Kinta, 21 Maiu 2020 14:11
Rate this item
(0 votes)