Parpol Labele Taka Publisidade iha Dalan Protokolu

DILI: Lei fó dalan ba partidu polítiku sira halo publisidade iha dalan ninin, maibé fatin labele iha dalan protokolu sira, tanba fatin sira ne’e ba de’it iha atividade komersiante.

Adjuntu Autoridade Munisípiu Dili, José Smith hateten, publisidade atu taka tenke husu lisensa ba Munisípiu Dili sira mak bele fó autorizasaun atu taka iha ne'ebé.

Nia esplika, publisidade ba kampaña partidu polítiku sira sei la kona koema, tanba sira la’ós halo atividade komersiante.

“Ita sei fó liberdade ba sira no fatin protokolu ita sei la fó autorizasaun”, dehan José, iha knaar fatin, Matadouru-Dili, horisehik.

Nia dehan, kona-ba dalan protokolu mak hanesan estátua Prezidente Nicolau Lobato mai to’o Palasiu Governu no tesik tan mai iha Sentru Konvensaun Dili (CCD). Fatin hirak ne’e bandu atu atu taka banner ka saida de'it.

“Se karik ida ne’e mak mosu ekipa husi jestaun merkadu sei ba hasai hotu”, tenik nia.

Aumenta Montajen CCTV iha Dili

Iha biban ne’e, adjuntu ne’e mós informa kona-ba planu atu aumenta tan Closed Circuit Television (CCTV) iha Dili atu bele kontrola kapitál ne’e ho di’ak.

Maibé, ida ne’e sei iha faze diskusaun tanba sei haree mós ninia vantajen no dezvantajen.

“Telkomcel hakarak mai fa'an ninia produtu iha ne’e, maibé tenke haree mós ba kapasidade kompara, tanba atu instala CCTV iha Dili laran tomak presiza orsamentu boot”, dehan José.

Utilizasaun CCTV iha Dili atu kontrola mós kona-ba ema sira soe lixu arbiru tanba ne’e tenke uza sistema sira ne’e para atu ajuda.