Serémonia entrega maskara ne’e ofisialmente husi Embaxadór Xina ba Timor-Leste, Xiao Jianguo’s ba Vise MAE, Lino de Jesus Torezao, iha embaixada China iha Pantai Kelapa, kinta horsehik.

“Ohin Embaxada Xina fó Maskara hamutuk 40,000 ba iha Munisipiu Covalima liu husi Ministeriu Administrasaun Estatal,”informa Embaxador Xina, iha Timor Leste, Xiao Jianguo’s, ba jornalista sira iha Embaxada Xina, Pantai Kelapa.

Nia hatutan, apoiu sira ne’e bele halo ona parte prevensaun pandemia Covid-19 iha Timor-Leste, liliu iha munisipiu Covalima, ne’ebé aplika ona Lockdown durante fulan ida.

“Pedidu ida ne’e husu husi Ministeriu Administrasaun Estatal, mai iha embaxada Xina, no iha tempu badak nia laran ami resposta kedas ba iha ajuda ne’e,”dehan Emabaxadór.

Iha fatin hanesan, Vise-Ministru Administrasaun Estatal, Lino de Jesus Torrezão, hatete, Xina iha interese duni atu ajuda ema sira iha Covalima no interesadu duni atu simu apoiu ba Covid-19 ne’e hodi bele defende sira nia an husi moras ne’e.

“Moras transmisaun lokal ba Covid-19 ne’e importa husi Indonezia mak mai, tanba ita tenki eduka ita nia komunidade sira atu uza maskara, fase liman bebeik no tenki kumpri regra husi Organizasaun Mundial Saúde (OMS) nian,”tenik Lino.

Nune’e, hahù aban (ohin) ba oin ne’e planeia ona atu transporta sasan sira ne’e ba iha Covalima, maibe iha deit kondutor ho nia ajudante ida mak sei tula maskara ne’e ba iha Munisipiu Covalima.

Enkuantu Administrador Interinu Munisipiu Covalima, Francisco de Andrade, hatete, iha tempu ida hanesan ne’e mak ema hakarak ajuda ne’e signifika ema hadomi Timor, no nudar autoridade munisipiu Covalima agradese ba governu China, tanba iha situasaun ida hanesan ne’e populasaun Covalima bele hetan apoiu husi China.

“Apoiu sira ne’ebe mak embaxada China fó ami sei hodi liu ba iha ami nia komunidade sira iha Covalima”, dehan Francisco.