Hafoin asina MoU, Diretór Komisaun Justisa ba Paz-Arquidiocese Metropolitana Dili, Padre Deometro da Conceição Xavier esplika, kria parseira ho parte WVTL, tanba programa  ne’ebé atu realiza ne’e relevante tebes ho misaun Komisaun Justisa ba Paz, ne’ebé ko’alia liu kona-ba Dame.

Liuhusi akordu ne’e, iha programa rua mak atu hala’o, kona-ba protesaun labarik no selebrasaun familia.

Teknikamente, husi pakote ne’e ekipa sei tun ba sosiedade, liuliu iha area rural sira ne'ebé idetifika aktu violensia as.

"Ami foti programa rua, ida ba protesaun labarik no selebrasaun familia, tanba sosiedade nia hun mak familia,bainhira familia di'ak sei forma mós sosiedade ne'ebé di'ak,"dehan Padre Deometro hafoin asina MoU ho WVTL, iha Arquidiocese Metropolitana Dili, Lecidere, Segunda (26/07).

Nia fundamenta, programa ne’e sei tuir etapa, tanba ne’e hafoin asina MoU ekipa sira sei tun ba halo observasaun ba fatin ne'ebé tama iha alvu ba implementasaun programa ne’e. Iha fatin refere ekipa sira sei halo formasaun ba uma kain sira.

"Husi formasaun kona-ba protesaun ba labarik mak oinsa inan-aman halo tratamentu ne'ebe di'ak ba labarik, ita halo programa ne'e maske durante ne’e sosiedade sivil barak mak halo protesaun ba labarik, maibé iha area rural seidauk asesu didiak direitu labarik nian,"nia dehan.

Programa ba protesaun labarik nian sei hala'o iha fatin rua iha Munisipiu Aileu, hanesan Liquidoe no Remexiu.

Kontratu ba programa refere tinan ida, hahú husi asina akordu to’o tinan oin (2022).

Iha fatin hanesan, Diretora WVTL, Miguela Shilla hateten, Word Vision servisu hamutuk ho organizasaun kristaun iha nasaun atus ida resin iha mundu.

Word Vision ho Igreja servisu nu'udar parseiru estratejiku ida hodi haree liu ba assuntu umanidade sira ne’ebé relevante liliu iha Timor-Leste.

Tanba liuhusi asina akordu ne’e, Word Vision sei halo koordenasaun maximu ho parte Igreja oinsa atu fó hanoin ba inan-aman hodi proteze labarik no labele hamosu violensia oi-oin hasoru labarik sira.

Kona-ba programa selebrasaun familia, nia esplika katak, oinsa familia bele tau matan ba labarik sira no fó domin ne'ebé nakonu.

"Ami fiar katak Igreja besik liu ho komunidade no sira hatene liu komunidade sira nia nesesidade ne'ebé eziste nanis tiha ona iha fatin sira ne’e antes Word Vision tama Igreja sei kontinua nafatin servisu komunidade sira bainhira Word Vision remata ninia servisu ha’u vizita ona fatin barak iha Timor-Leste dalaruma ita haree fatin sira ne’e la iha atendimentu baziku, ezemplu hanesan fasilidade saúde maske fasilidade sira ne’e la iha maibé Igreja iha,"nia informa.

Word Vision mós fiar katak, iha fatin barak ne'ebé mukit ki’ak eziste la’os tanba ki’ak ka mukit ba hahan ho sasan de’it maibé ki’ak mós iha espiritualidade.

"Apoiu seluk mak WVTL bele fó finansiamentu, maibé finanseiru refere la espesifiku, tanba WVTL flexibel depende ba nesessidade ne'ebé iha bainhira presiza koko atu ajusta,”dehan nia.

Asistente Editor: Saturnina da Costa